මානවයා මිනිහා බවට පත් වෙමින් යද්දී එක කාලෙකදි ඔවුන්ගේ නැට්ට හැලුනා. ඉන් පස්සේ ටික ටික මිනිසුන්ට ඇඳුම් එකතු වුණා. ඒ ඇයි කියන එකට පැහැදිළි උත්තරයක් නැතත් අද වනවිට ලොව සිටින නොදියුණුම ගෝත්‍රික ප්‍රජාව හැර බොහොමයක් මිනිසුන් ඇඳුම් අඳිනවා. ඇඳුම ගැන වෙනස් මතයක් තිබුණ පුරාණ ග්‍රීසිය ඔලිම්පික් උළෙල ඇඳුම් නැතුව පැවැත්වූවා. ක්‍රීඩකයින් නිරුවතින් මලල ක්‍රීඩා අවස්ථාවන්ට සහභාගී වූවා වැනිව නැවත ඔලිම්පික් නිරුවතින් තියන්න පුළුවන්ද? හැමෝම දන්නවා බැහැ කියලා. එහෙම බැරි වෙන්න බලපාන වෙනස් සාධක කිහිපයක් අපි සළකා බලමු.
ක්‍රීඩා ඇඳුම් පැළඳුම් කියන්නේ එක්තරා විලාසිතාවකුත් වෙලා. සාමාන්‍යයෙන් ක්‍රීඩා කටයුතු වල නිරත නොවන අයත් ඒ හා සම්බන්ධ ඇඳුම් පැළඳුම් අඳින්නට කැමතියි. දැන් පිහිනීමට තිබෙන ඇඳුම් ආදි කාලයේ නිරුවතින් පිහිනනවාට වඩා පිහිනීම පහසු කරනවා. වාර්තා වලට අවශ්‍ය ප්‍රතිරෝධය අවම කිරීමේ ගුණයෙන් යුතු වෙනවා. දැන් සාමාන්‍ය යටිපතුල් බිම තියලා දුවනවාට වඩා හොඳ ගැම්මක් ගන්න පුළුවන් දුවන සපත්තු තියෙනවා. ජිම්නාස්ටික් වගේ ක්‍රීඩාවකදි ඇඳුම් නැතිව කළොත් එය ක්‍රීඩාවටත් සෘජුව බාධාවක් වෙනවා. ඇඳුම් ආයිත්තම් මගින් විලිවසාගැනීමට අමතරව ක්‍රීඩාවේදී ක්‍රීඩාවට මනා සහායක්ද ලැබෙනවා.
දැනටත් මලල ක්‍රීඩා වලට සහභාගි වන ක්‍රීඩිකාවන් රැසක් සිය පියයුරු සහ ලිංගික පෙදෙස් පමණක් වැසෙන කෙටි ඇඳුම් වලින් සැරසෙනවා. පිරිමි ක්‍රීඩකයොත් හුදෙක් ඇඟට ඇලුණු ඇඳුමින් පමණක් ක්‍රීඩා කරනවා. ශීත සෘතු ඔලිම්පික් වලට නම් කොහොමත් ඇඳුම් ලේයර් කිහිපයක් අඳිනවා. ඒත් ගිම්හාන ඔලිම්පික් වලදි බොහෝ ක්‍රීඩකයින් ඇඳුම් අඩුවෙන්, සැහැල්ලුවෙන් සහභාගී වෙනවා. බර ඉසිලීම, කඩු ශිල්ප ආදී ක්‍රීඩා වලදී ඇඳුමින් අමතර ආරක්ෂාවක් ලැබෙන නිසා ඒ ඉසව් වලදි අදාළ ඇඳුම් පැළඳුම් ඇඳගන්න ක්‍රීඩකයින් පෙළඹෙනවා.
බොහෝ ඇඳුම් වර්තමානය වනවිට ක්‍රීඩාව ඉලක්ක කරගෙන හැදුනත්, ඒ ඇඳුම් මගින් සිරුරේ රුධිර ගමනාගමනය යම් තරමකින් සීමා කරනවා. ඒ වගේම ඇඳුම් වලින් සිරුර සිසිල් වීමත් පමා කරනවා. පිහිනීම් ඉසව් වලදී 2008 බීජිං ඔලිම්පික් වලදී නව වාර්තා 25ක් පිහිටෙව්වා. එයින් ක්‍රීඩකයින් 23ක්ම පිහිනීමේදී ජලයේ ප්‍රතිරෝධය අවම කරන එල් සෙඩ් ආර් ලේසර් කියන තාක්ෂණයෙන් නිමවූ පොලිරෙතීන් ඇඳුමක් ඇඳ තිබුණා. එහෙත් එවන් ඇඳුම් වලින් සහායක් ලැබුණත් ඇඳුම් නිසා ඇතිවන රුධිර ගමනාගමන බාධා සහ අපහසුතාවන් නිසා ක්‍රීඩක හැකියාවන් යම් තරමකින් අඩු වන්නට පුළුවන් කියාත් මතයක් තියෙනවා.
ඔලිම්පික් උළෙලට සහභාගී වන ක්‍රීඩක ක්‍රීඩිකාවන් වයස 18ට අඩු වෙන අවස්ථාත් තියෙනවා. යම් ලෙසකින් ඔලිම්පික් උළෙල නිරුවතින් පැවැත්වුවොත් එය මේ 18ට අඩු අයට සැරට බලපානවා. ඒ වගේම ක්‍රීඩා කටයුතු වලදී හිතාමතා නිරුවත පෙන්වීම ක්‍රීඩා නීති අනුව වරදක්. එසේම අන්තර්ජාල මාධ්‍යයන්ට වගේම ලොව පුරා තරඟාවලි විකාශන ආයතනවලටත් මෙය ලොකු හිසරදයක් වෙනවා නිරුවතින් ඔලිම්පික් තිබුණොත්. ලොව පුරා වැඩිම දෙනෙක් නරඹන ක්‍රීඩා සැණකෙළිය එවිට වැඩිහිටියන්ට පමණක් නරඹන්නට හැකි අවස්ථාවක් වෙනවා. එසේම අන්තර්ජාලයේ පවා නිරුවත හුවමාරු කරගන්නට තිබෙන බාධා නිසා බොහෝ පිරිසකට ඔලිම්පික් නැරඹීමේ අවස්ථාව ගිලිහී යන්නට ඉඩ තිබෙනවා.
Saru Fm Media
