බඳින්න ප්ලෑන් කරන් ඉන්න අයට හිතට නැගෙන ප්‍රශ්න ගැන කතා කරමු – Saru News Media

0
18

සංසාරෙ පුරාවට ඔතාගෙන යන්න පතාගෙන ආපු කුරුළු ජෝඩුවක් ඔන්න ඉතින් මුණගැහුන දවසෙ ඉඳන් හිතන්නෙ එකට කූඩු වෙන හැටිනෙ. කසාදයක් කියන්නෙත් ලේසි සෙල්ලමක් නෙමෙයි. තමන්ට හරියටම හරියන සහකාරය තෝරගන්න තැන ඉඳලම ආයෙත් මැරෙන තුරාවටම බොහෝම පරිස්සමට කරන්න ඕන කාරියක්. කොයි හැටි වෙතත් මේ කියන්න යන්නෙ ඔන්න ඔහොම ඔතාගෙනම යන්න ටක්කෙටම හිතපු ජෝඩු කසාදයක් බඳිනවමයි කියල තීරණය කරපු ගමන් හා හාපුරා කියල ඔළුවට එන ප්‍රශ්න කිහිපයක් ගැනයි. දැන් ඔය හරියටම හරියන ඉතුරු බාගෙ හොයාගෙන ඉන්න නංගිලා මල්ලිලා එන්න බලන්න මේ පැත්තට ඔළු ගෙඩිය දාල යන්න. 


ඔන්න ඕක තමයි ඕනෙම ජෝඩුවක් තමන් විවාහ වෙන බව හරියටම තීරණය කළාට පස්සෙ මුලින්ම ලොකුවටම හිතන්න ඕන කාරණාව. “අපෝ ඉතින් බඳිනවනම් වෙඩිමක් ගන්නම එපැයි” වගේ සරලව පෙනුනට අද කාලෙ යන වියදම්, ට්‍රෙන්ඩ්ස් බැලුවම මේක පේනවට වඩා ගැඹුරක් තියෙන කාරණාවක්. වෙඩින් එකක් ගන්නව කියන්න එක අද වෙද්දි ඉස්සර වගේ සරල නැහැ. සල්ලි ලොරි පිටින් තිබ්බත් ඉවර කරල දාන්න පුළුවන් එක එක සුකුරුත්තන් අයිටම්ස් වෙඩිං කියන මාතෘකාව අස්සෙ ගොඩ ගැහිල. එක වැඩක් බලන්න ගියාම තව වැඩ කෝටියක් පෙන්නනව. ඉතින් දැක්කම ආසත් හිතෙනව. ඉස්සර ස්ටුඩියෝ එකට ගිහින් ජෝඩුව ගහපු ෆොටෝ එක අද ප්‍රී වෙඩින් ශූට්, වෙඩින් ශූට්, ෆන්ක්ශන් ශූට්, විඩියෝ ශූට් වෙන වෙනම. 

ඉතින් ඔක්කෝටම කලින් දෙන්න එකතුවෙලා දෙමව්පියන්ගෙ අනු දැනුමත් ඇතුව තීරණය කරන්න ඕන අපිට ඇත්තටම මහා පරිමාණ වෙඩින් එකක් ගන්නම ඕනෙද කියන කාරණාව. මොකද ඔය කොයික ක​ළත් එක දවසයි දෙකයි, පැය කිහිපයයි. ඉතින් අලුත් ජෝඩුවට හිතෙනවනම් අනවශ්‍ය වියදම් කපා හැරල ඒ සල්ලි පිනකට දහමකට හරි වෙන ප්‍රයෝජනවත් වැඩකට හරි යොදවන්න ඒක හොඳ බුද්ධිමත් තීරණයක්.  හැබැයි දෙන්නම හරිම ආසයිනම් ලස්සන ලොකු වෙඩින් එකක් ගන්න ඒකත් තමන්ගෙ කැමැත්තනෙ. අන්න ඒ නිසා තමා දෙන්න එක්ක මුල්ලක් අල්ලන් වාඩිවෙලා මේ කාරණාව කතා බහ කරගන්න ඕන. 

ඔන්න මේ කාරණේ කලින් එකත් එක්ක සෘජුවම සම්බන්ධ වෙන කාරණයක්. දැන් ඔන්න වෙඩින් එකක්නම් ගන්නෙ නැහැ, අපි ඒ සල්ලි වලින් වෙන දෙයක් කර ගන්නව කියල හිතුව කියන්නකෝ. අන්න ඒ අයට පුළුවන් ලඟම නෑදෑ හිතවත්තු ටික එකතු කරගෙන පොඩියට රෙජිස්ට්‍රේශන් ෆන්ක්ශන් එකක් ගන්න. හැමදාම ලඟ තියාගන්න ලස්සන ෆොටෝ දෙක තුනක් අරන් තියාගන්න. හැබැයි එහෙම නැතුව වෙඩිමක් ගන්නවමයි කියල හිතපු අයට වෙනමම රෙජිස්ට්‍රේශන් එකක් ගන්නවද නැද්ද කියල තීරණය කරන්න ඔප්ශන් දෙකක් තියෙනව. අපි මෙතනදි හුඟක්ම වියදම අඩු කරන්න කතා කරන නිසා හොඳම විසඳුම තමයි වැඩ දෙකම එක දවසෙන් කරල ඉවරයක් කරන එක. මොකද වියදම විතරක් නෙමෙයි, කාලය, ශ්‍රමය කියන ඔක්කොම ඉතුරුයිනෙ. 

මේක තමා කොයිකටත් වඩා වැදගත්ම කාරණය. මෙතනදිනම් දෙන්නත් එක්ක බොහෝම බුද්ධිමත්ව සාකච්ඡා කරන්න ඕන අනාගතේ ගැන. උත්සවයට සල්ලි වියදම් කරන්නෙ තමන් උනත් අම්මල තාත්තල උනත් ඒ වියදම් වෙන්නෙ තමන්ගෙ ජීවිතේ යමක් කමක් කරකියාගන්න තියෙන මුදලක් බව හොඳටම ඔළුවෙ තියාගන්න ඕන. රැල්ලට ගිහින් නිරපරාදෙ ලක්​ෂ ගාණක් සල්ලි විසි කරනවට වඩා ලස්සනට වැඩ කරගන්න ඕන තරම් තැන් දැන් මේ වෙළඳපලේ තියෙනව. හැබැයි ඉතින් වැඩේ බාර දීල අතපිහගෙන ඉන්නනම් බැහැ. මුල ඉඳලම ටිකක් මහන්සි වෙලා හොයල බලල ලඟින්ම ඉඳන් කරගත්තොත් අඩු මුදලට ලස්සන වැඩක් කරගන්න පුළුවන්. අන්න ඒ නිසා දෙන්නත් එක්ක ටිකක් ඇවිදල, වෙඩිං ශෝව්ස් එහෙම ටිකක් බලල තමන්ට හරියන හොඳම බජට් එක තීරණය කරගන්න ඕන. නැතුව වැඩ කරන කරන වෙලාවට බජට් එක වෙනස් කරන්නනම් තියාගන්න එපා ඔන්න. 

ඔන්න ඊළඟ ප්‍රශ්නය. වෙඩිං එක හෝම් කමින්ග් එක ඇතුළු ෆන්ක්ශන්ස් කීයක් ගන්නවද කියන එක. වියදම සහ පහසුව ගැන හුඟක් හිතනවනම් ඔන්න දැන් අලුත්ම සහ ලේසිම ක්‍රමය තමයි ෆන්ක්ශන්ස් දෙක තුනක් නොගෙන එකම දවසේ වැඩේ අහවරක් කරන එක. හැබැයි ඉතින් මේ කාරණේට දෙපැත්තෙම දෙමව්පියොත් කැමති කරවගන්න ඕන. අපෝ අපේ පැත්තෙනුත් උත්සවයක් නොගෙන බෑනෙ වගේ පරණ අදහස් වලට නොයා දෙගොල්ලන්ටම පහසු විදිහට වැඩේ කරගන්න කැමතිනම් ඔන්න හරි. 

මෙන්න තවත් බැරෑරුම් ප්‍රශ්නයක්. මේක තවත් ටිකක් රට පැටලෙන ප්‍රශ්නයක් වෙන්නෙ කසාද බඳින දෙන්න ආගම් දෙකක උනහම. චර්ච් ෆන්ක්ශන් එකත් අරන් පෝරුවත් තියන්න ඕන වගේ ගැටලු ආවම වෙලාව එහෙම හදාගන්න අමාරු වෙන්න පුළුවන්. ඒ නිසා මුලින්ම කතා කරලා බේරුමක් කරගන්න ඕන චාරිත්‍ර කරන විදිහ, ඒවට වෙන් කරන වෙලාවල් සහ ඒ ඒ අදාල දේවල් වලට බජට් එකෙන් වෙන් කරන මුදල් ගැන.

මෙතන තමයි හුඟක් වෙඩින් වල පවුල් දෙකම හිරවෙන තැන. කොච්චර අරහෙට මෙහෙට කරකවල හැදුවත් ඉන්වයිටීස් ලිස්ට් එක හදාගන්න තමා කාටත් අමාරු. දෑහැට දැකල නැති නෑයො මතක් වෙනව ලිස්ට් හදද්දි. 

ඉස්සෙල්ලාම තෝරගත්ත ෆන්ක්ශන්ස් ගා​ණ අනුව ලිමිට් එකක් හිතාගන්න එක දවසකට එක පැත්තකින් මෙන්න මෙච්චරයි උපරිම ඉන්වයිටීස්ල කියල. නැතුව මතක් වෙන ගා​ණට ඇඩ් ක​ළොත් ලිස්ට් එක හිතාගන්න බැරි තරම් දිගවෙයි. ජීවිතේට වචන දහයකට වඩා කතා කරල නැති නෑයොයි නොනෑයොයි ඇඩ් කරන්න කලින් හොඳට කල්පනා කරල බලන්න. කාල බීල ගියාට පස්සෙ කාටත් ඕව මතක නැහැ. 

මෙන්න මෙතනට එන්න ඕන නිසා තමයි ඔය මුල කියපු ඔක්කෝම කිව්වෙ ඔන්න. වෙඩින් එක අරන් අත පිහදාගෙන පැත්තකට වෙන්න බෑනෙ ඉතින්. එදායින් පස්සෙ අර මුලින් කිව්ව වගේ ජීවිතේ තියෙනකම්ම දෙන්නත් එක්ක ඇදගෙන යන්න ඕන. උපදෙස් දෙන්නයි සල්ලි කඩාගන්නයි එන නෑදෑයො යාළුවො එදාට පස්සෙ දකින්නවත් නැතිවෙයි. අනිත් එක තමයි වෙඩිං එකෙන්නම් කවදාවත් වියදම් කරපු මුදලින් කාලක්වත් ආයෙත් බලාපොරොත්තු වෙන්නනම් බැහැ. අන්න ඒ නිසා තමයි මුල ඉඳලම බොහෝම බුද්ධිමත්ව තියෙන පලියට වියදම් නොකර මේ වැඩේ කරගන්න ඕන. අඩු වියදමෙන් චාම් ලස්සන වෙඩින් එකක් අරගෙන ඉතුරු වෙන සල්ලි බැංකුවක දාල ලස්සනට ජීවිතේ ප්ලෑන් කරගන්න පුළුවන්නම් අන්න එදාට තමයි ඔන්න දෙන්න දිනුව වෙන්නෙ.

Saru FM Media

LEAVE A REPLY

Please enter your comment!
Please enter your name here