ලංකාවේ අපි අතර භාවිතා වන අපේම ඇප්ස් 9ක් – Saru News Media

0
10

සාමාන්‍ය ෆෝන් එක ස්මාට්ෆෝන් එකක් වීමත් සමග එයින් ගත හැකි වැඩ සංඛ්‍යාව විශාල ගණනකින් වැඩි විය. ඒ ඒ කාර්යයන් කරගැනීමට පහසු වන පරිදි ඇප්ස්ද විශාල සංඛ්‍යාවක් ටික කලකින්ම ඇප් ස්ටෝර් වලට එකතු විය. ලෝක පූජිත ෆේස්බුක්, ඉමෝ, වට්සැප්, වයිබර් වැනි සමාජ ජාල හැරුණු කල ලංකාවේ අපි අතර වඩාත් ජනප්‍රිය ඇප්ස් කීපයක් තිබේ. අපේ ෆෝන් එකට ඇතුළත් කරගෙන හෝ අත්හදා බැලීමට වටිනා ඒ ඇප්ස් ගැන අපි තොරතුරු ටිකක් දැනගමු.

 

ස්මාට්ෆෝන් පැමිණි මුල් කාලයේ සිංහල බසින් ටයිප් කිරීමට නොහැකි වීම මහත් ගැටළුවක් විය. ඉන් පසු කලකදී හෙළකුරු මගින් ඒ ගැටළුව සම්පූර්ණයෙන්ම පාහේ විසඳා දෙන ලදී. පසු කාලීනව ගූගල් කී බෝඩ් එකටද සිංහල බස ගියමුත් වඩාත් පහසු හෙළකුරු ලංකාවේ බොහෝ දෙනා සිංහල බසින් ටයිප් කිරීමට යොදා ගනී. හාරලක්ෂයකට අධික ජනතාවක් දිනකට හෙළකුරු සක්‍රියව භාවිතා කරන අතර මේ වනවිට මිලියන 2.2කට අධික උපාංග ප්‍රමාණයකට හෙළකුරු ඇප් එක ඇතුළත් කරගෙන තිබේ.

 

දුම්රිය ගමන් වේලාවල් දැනගැනීම සඳහා ඇති ඇප්ස් දුම්රිය සේවාවේ යන එන අය අතර ප්‍රචලිත වී තිබේ. රජයේ දුම්රිය දෙපාර්තමේන්තුවෙන් සැපයූ ඇප් එක බොහෝ විට නිවැරදිව වැඩ නොකරන අතර ඒ නිසා වෙනත් ඇප්ස් කරළියට පැමිණ තිබේ. ඉන්දියාවේ දී නම් දුම්රිය ඇප් හරහා දුම්රිය කාලසටහන බැලීම මෙන්ම දුම්රිය ටිකට් වෙන් කරගැනීම, දුම්රිය ධාවනය වන ස්ථානය නිවැරදිව බලාගැනීම ආදී වැඩකටයුතු රාශියක් ලබාගත හැකිය. අපේ රටේත් එවැනි දුම්රිය මගීන්ට ප්‍රයෝජනවත් තොරතුරු කිහිපයක්ම ලබාගත හැකි ඇප් එකක් නිමවීමට රජයේ දුම්රිය මගීන්ගේ නිල සමූහය නැමැති ෆේස්බුක් සංවිධානය සැරසී සිටී.

 

වෙබ් අවකාශයේදි මධුර ඔන්ලයින් නම් වෙබ් ශබ්දකෝශය භාවිතා කිරීම පහසුය. එසේම ඉංග්‍රීසි සිංහල පරිවර්තන කටයුතු අන්තර්ජාලය නොමැති අවස්ථාවේදී යොදාගත හැකි ඉංග්‍රීසි සිංහල පරිවර්තන ඇප්ස්ද කිහිපයක්ම ඇප් ස්ටෝර් වල තිබේ.

 

ටැක්සියක් වෙන්කර ගැනීමට කෝල් කළ යුතු කාලය හමාර වී, ඇප් එකෙන්ම රූට් එක සහ වාහනය තෝරාගෙන වාහනයක් ඇනවුම් කිරීමට දැන් පික් මී හරහා අවකාශ ලැබී තිබේ. පික් මී සේවාව වඩාත් ජනතාව අතර පැතිරගිය අතර කලකට පෙර සාමාන්‍ය කැබ් සේවාවන් මගින් කාර් රිය පමණක් වෙන්කරගත හැකි වූ විට පික් මී මගින් ත්‍රීවීලර් රථ ද ගෙන්වාගැනීමේ පහසුකම ලැබුණි. ඉඳහිට හෝ නිතිපතා හෝ කුලී රිය සොයන අයට පික් මී ගැලපෙනම ඇප් එකකි.

 

ඩයලොග් සමාගම මගින් හඳුන්වා දුන් වීටා ඇප් එක සෞඛ්‍ය සේවාවක් සඳහා නිමවුණු සාර්ථක ඇප් එකකි. ඒ හරහා ඩෙංගු පැතිරගිය සමයේදී ඩෙංගු ව්‍යාප්තිය නිවැරදිව සොයාගැනීමට අදාළ බලධාරින්ට පහසු විය. එහෙත් ඇප් එක හරහා ලබාගන්නා වාර්තා වඩාත් විශ්වාසනීය වන්නට නම් ඒ ඩෙංගු රෝගීන් ගැන වූ ඇප් එකේ දත්ත යාවත්කාලීන විය යුතුය. එහිදී සිදුවන්නේ ඩෙංගු රෝගීන් සිටින පළාත් ගැන දැනුවත් කිරීමකි. එයින් පසු අදාළ අංශ වලට ඒ පැතිරීම තිබෙන ප්‍රදේශවලට කෙලින්ම ඇතුලත් වී පිරිසිදු කිරීම් වැනි කටයුතු කළ හැකි වීම එහි ඇති මහඟු වාසියකි.

 

චාරිකාවක් යන විට ගීත ගැයීමට කෙතරම් ආසාව තිබුනත් ගීපද අමතක වීම ලොකු ගැටලුවකි. එය මගහරිනු වස් සිංහල ලිරික්ස් යනුවෙන් ඇන්ඩ්‍රොයිඩ් ඇප් එකක් සැකසී තිබේ. අප අවශ්‍ය ගායකයා තේරූ විට ඔහු ගැයූ ගීත රැසක ලිරික්ස් එහි තිබෙන අතර ඒ ඔස්සේ අපිට අදාළ ගීතයේ පදවැල් සහ ස්වර ප්‍රස්ථාර ආදිය බලාගත හැකිය. ගීත ගායනා කර විනෝද වීමට මෙන්ම සංගීත භාණ්ඩ හරහා ගීත වාදනය කිරීමටත් මේ සිංහල ලිරික්ස් සහ මියුසික් ප්‍රස්ථාර ඇතුළත් ඇප් එක හරහා හැකිය.

 

ගමේ ගොඩේ සිදාදියේ කවුරුත් පාහේ… බඩු ගන්නයි විකුණන්නයි පොළටයි ආවේ අද පොළටයි ආවේ… යනු ජෝතිපාල ගේ ජනප්‍රිය පැරණි ගීයකි. ඒ ගීයට අනුව එදා බඩු විකිණීමටත් මිලදී ගැනීමටත් ගමේ ගොඩේ සියලු දෙනා පොළ කරා ගියෝය. ඔන්ලයින් අවකාශය තුළ බඩු විකිණීමටත් බඩු මිලදී ගැනීමටත් අද ඉක්මන්. එල් කේ අඩවිය ජනප්‍රිය වී තිබේ. ඒ හරහා ඉලෙක්ට්‍රොනික බඩු, ස්මාට්ෆෝන්, රථවාහන මෙන්ම ගස් වැල් මල් පළතුරු පවා දැන් දැන් ගජරාමෙට විකිණේ.

Saru FM Media

LEAVE A REPLY

Please enter your comment!
Please enter your name here