වැඩිහිටියන් කියන්නේ මොනා නැතත් අපිට වඩා අත්දැකීම් තියෙන උදවිය. වෙලාවකට දෙන උපදෙස් මහ ඇණයක් වගේ වුණත් අපිට වැඩිහිටියන් ඇසුරු කරන්න, ඔවුන්ගෙන් උපදෙස් ගන්න වෙන වෙලාවල් තියෙනවා. ඥාති හමුවීම් විතරක් නෙමෙයි, ඔෆිස් විසිට් ආදියෙදිත් අපිට තරමක වැඩිහිටියන් කතාවට සෙට් වෙනවා. ඉතින් ඒ හමු වුණාම කතාකරන්න හොඳ මාතෘකා කීපයක් අපි බලමු.
“ඒ කාලේ අපි රුපියල් දෙකක් අරං කඩේ ගියාම මල්ලක් පිරෙන්න බඩු ගන්නවා. දැන් ඉතින් දෙදාහක් ගෙනිච්චත් බැහැ නෙව.” ඒ කාලේ සීයලා සෙට් වුණාම එහෙම කතා කරනවා. අද වුණත් රුපියල් දෙකක් ගෙනහින් මල්ල පිරෙන්න බඩු ගන්න පුළුවන් කඩවල සී සී ටීවී නැත්තං. ඒත් දැන් සිල්ලර කඩ වල පවා සී සී ටීවී තියෙන නිසා වැඩේ අමාරුයි. ඒ කාලේ සත දෙකට, රුපියලට, රුපියල් දහයට කරපු කියපු දේවල් කියවන එකත්, අද සල්ලි වල අගය නැති වෙන එකත් හොඳ රසවත් මාතෘකාවක්.
පවුලේ නම්බුව නැතිකරන යාළුවෙක් හරි ඥාතියෙක් හරි ඉන්නවා. එහෙම නැතිනම් ගමේ නම්බුව නැති කරන කෙනෙක් හරි ඉන්නවා. එයාල එක්කෝ වැරැදි කාරයෝ වෙලා හිරේ විලංගුවේ වැටිලා. නැත්තම් ගෑණු හුටපට වලට පැටලිලා. කොහොම වුණත් ඒ 1045 වැනි වතාවක් විතර කතා කරපු මාතෘකාව නැවත නැවත අරගෙන ඒ නම්බුව නැතිවුණ කතා වස්තුවේ අග සිට මුලට නැවත කතා කිරීම වැඩිහිටියන්ට සතුටු වැඩක්. ඒ වගේ ටොපික් එකක් කතාකරද්දි ඒ ඒ වැඩිහිටියන්ගේ මතය ගැන හොඳ අවබෝධයකින් ඉන්න ඕනි.
ලොකු තැන් ගැන කතාකරද්දි ඒ ඒ අයගේ දේශපාලන මතවාදය ගැන අපිට පොඩි අදහසක් තියෙන්නට ඕනි. යූ එන් පී කෙනෙක් නම් සිරිමාගේ කාලේ රටේ මිනිස්සු කන්න බොන්න නැතුව දුක් වින්ද හැටි. කොළඹ ඇවිත් බත් කාල කොළේ විසික් කළාම ඒකට මිනිස්සු පොරකාපු හැටි. පෝලිම් ගැන කතාකරන්න වැඩිහිටියන් කැමතියි. ශ්‍රී ලංකා කෙනෙක් නම් 77න් පස්සේ ජේ ආර් රට විනාස කළ හැටි ගැන කතාකරන එක වාසියි. ඒ වගේම මෑත කාලීන වැඩිහිටියෙක් නම් ගොඩක් වෙලාවට මහින්ද පාර්ශවයේද කියලා බලන එක වැදගත්. ඒ පිළේ තදබල අනුගාමිකයෙක්නම් ඒ පැත්තට ටිකක් වාසි විදිහට කතාකරන එක වාසියි නිකං වාද කර කර හිත තලාගන්නවට වඩා.
වාහන කියන්නේ ගම්බද වගේම නාගරික ජීවිත වල ඉලක්කයක්. හොඳ පොදු ප්‍රවාහණයක් නැති නිසා තමුන්ගේම වාහනයක යෑම කියන්නේ දුප්පත් මිනිස්සුන්ට මාර විනෝදයක්. ඒ වගේම යමක් කමක් තියෙන උදවියටත් එක වාහනයක් තියාගෙන වැඩි කලක් ඉන්න බැරි අමාරුවක් තියෙනවා. එහෙම අය අලුත් වාහන හොයනවා, තව වාහන ගන්නවා. ඉස්සර ඉඳන් වාහන තිබුණ කෙනෙක් නම් ඒ ඒ වාහන වල තත්ත්වය, ෆීචර්ස් ඉස්සර වාහන වල හයිය හත්තිය, රළු පාවිච්චියට ගැලපුණු හැටි ගැන කතා කරන්නට පුළුවන්. ඒ වගේ වෙලාවක වාහන ලෝලී අංකල් කෙනෙක්ගේ කතා වලට හොඳට පෝර දාගෙන හිටියොත් ගෙදරට නාකි වෙන දුව පවා ඔයාට තල්ලු කරගන්න ලේසි වෙයි.
Saru FM Media
