මුදල් රාජ්‍ය අමාත්‍ය ශෙහාන් සේමසිංහ මහතා ජාත්‍යන්තර මූල්‍ය අරමුදලේ නියෝජ්‍ය කළමනාකාර අධ්‍යක්ෂ කෙන්ජි ඔකමුරා ඇතුළු පිරිසක් හමු වී සාකච්ඡාවල නිරත වී ඇතිබව මුදල් රාජ්‍ය අමාත්‍යංශය පවසයි.
ඊයේ (15) අමෙරිකාවේ වොෂින්ටන් නුවරදී ආරම්භ වූ ජාත්‍යන්තර මූල්‍ය අරමුදලේ සහ ලෝක බැංකුවේ වසර මැද සමුළුව අතුරතුරදී එම හමුව සිදුව තිබේ.
පවතින ආර්ථික තත්ත්වයෙන් ඉදිරියට යෑම සඳහා ශක්තිමත් වැඩසටහන් ක්‍රියාත්මක කිරීම සහ විශිෂ්ට ප්‍රතිසංස්කරණ සිදු කිරීම සම්බන්ධයෙන් ජාත්‍යන්තර මූල්‍ය අරමුදලේ නියෝජ්‍ය කළමනාකාර අධ්‍යක්ෂ කෙන්ජි ඔකමුරා මහතා ශ්‍රී ලංකා බලධාරීන්ට ප්‍රශංසා කර ඇතිබව එම අමාත්‍යංශය පවසයි.
ජාත්‍යන්තර මූල්‍ය අරමුදලේ වැඩසටහනේ ආරම්භයේ සිටම වෙහෙස වී ශ්‍රී ලංකාව අත් කරගත් ජයග්‍රහණ ආරක්ෂා කර ගනිමින් එය පවත්වාගෙන යෑමේ අවශ්‍යතාවය ඔහු මෙහි දී අවධාරණය කර තිබේ.
මෑතකාලීන මෙරට සමාජ-ආර්ථික වර්ධනයන් සහ අයිඑම්එෆ් වැඩසටහන යටතේ සිදු කරන ලද සර්ව ආර්ථික ප්‍රතිපත්ති සහ ප්‍රතිසංස්කරණවල අඛණ්ඩතාව සහතික කිරීමට බලධාරීන්ගේ කැපවීම මෙහිදී ශෙහාන් සේමසිංහ මහතා පැහැදිලි කර තිබේ.
මේ අතර මුදල් රාජ්‍ය අමාත්‍ය ශෙහාන් සේමසිංහ මහතා ජාත්‍යන්තර මූල්‍ය අරමුදලේ විධායක අධ්‍යක්ෂ ආචාර්ය ක්‍රිෂ්ණමූර්ති සුබ්‍රමනියන් මහතා ද හමුවී තිබේ.
එහිදී අයිඑමඑෆ් වැඩසටහනේ 02 වැනි සමාලෝචනය අවසන් කිරීම සඳහා වන ඊළඟ පියවර පිළිබඳව සාකච්ඡා කර තිබේ.
ලෝක බැංකුවේ විධායක අධ්‍යක්ෂ පරමේෂ්වරන් අයියර් මහතා ද හමු වී සාකච්ඡා කළ බව ශෙහාන් සේමසිංහ මහතා X පණිවුඩයක් නිකුත් කරමින් පැවසීය.
අයියර් මහතා එහිදී ලෝක බැංකුව තුළ ඇති විවිධ අභ්‍යන්තර ප්‍රතිව්‍යුහගත කිරීම් සහ මෙම වෙනස්කම් ශ්‍රී ලංකාව වැනි රටවලට ප්‍රයෝජන ගත හැකි ආකාරය පිළිබඳව යාවත්කාලීන කළ අතර ශ්‍රී ලංකාවට තම උපරිම සහයෝගය ලබා දෙන බවට සහතික වී තිබේ.
මේ අතර මුදල රාජ්‍ය අමාත්‍ය ශෙහාන් සේමසිංහ මහතා ඇතුළු පිරිස ජාත්‍යන්තර අවබෝධය සඳහා වූ ව්‍යාපාරික කවුන්සිලය රැස්වීමකට ද එක් විය.
මෙරට ආර්ථික සංවර්ධනය පිළිබඳව එහි දී සාකච්ඡා කර ඇතිබව මුදල් රාජ්‍ය අමාත්‍යංශය වැඩිදුරටත් පවසයි.
– නාගොඩ සුමන උදයන්ත
Saru FM Media
