ඉන්දියාවේ කොවිඩ් හැදුණු රෝගීන්ට අලුත් දිලීර රෝග ජාතියක් ඇති වෙලා. දීලීර කියන්නේ වසර මිලියන හාරසීයක් විතර පෘථිවියේ තියෙන ජීවී විශේෂයක්. හතු බිම්මල් කියලා හඳුන්වන දිලීර වර්ග අපි ආහාරයටත් ගන්නවා. ඒ වගේම සමේ ඇතිවෙන අළුහම් කියන වර්ණ වෙනස ඇතිවන්නේ දිලීර ආසාදනයකින්. ඉකිලි, කිහිලි, කණ, උගුර වගේ ස්ථානවල දිලීර ආසාදන ඇති වෙනවා. ඉතින් කොවිඩ් හැදුන අයට හිස් කබල ආශ්‍රිතව ඇතිවෙන දිලීර තත්ත්වයක් ගැන මේ දවස්වල ඉන්දියාවෙන් ඇහෙනවා. අපි ඒ ගැන කරුණු ටිකක් සොයා බලමු.
මේ දිලීර ආසාදන තත්ත්වය ඇමරිකාවේ සහ එක්සත් රාජධානියේ යම් වැඩි වීමක් පෙන්නුම් කළත් ඉන්දියාවේ තරම් සුලභ වුණේ නැහැ. ඇතැම්විට ඉන්දියාවේ සාමාන්‍යයෙන් පවතින අපිරිසිදු තත්ත්වය මේ දිලීර ආසාදන වැඩිවෙන්නට හේතු වන්නට ඇති. දැනට වෙනත් රටවලින් මේ තත්ත්වය වාර්තා වෙනවා අඩුයි. මෙය කොවිඩ් හැදෙන රෝගීන්ගෙනුත් ඉතා සුළු ප්‍රමාණයකට තමයි වාර්තා වෙන්නේ. ඒත් ඉන්දියාව කියන්නේ දැනට කොවිඩ් ගම් පළාත් කරාත් ව්‍යාප්ත වුණ භූමියක් නිසා ඉන්දියාවට මේ කළු දිලීර රෝගය දරුණුවට බලපානවා.
කොවිඩ් නැති සාමාන්‍ය කාල වලදි මේක හැදෙන ලෙඩ්ඩු ඉන්දියාවේ උගුර, කණ, නාසා සායන වලින් වාර්තා වෙන්නේ අවුරුද්දකටම කීප දෙනෙක් විතරයිලු. ඒත් මෑතක කොවිඩ් රෝගය හැදුණු අයට මේ තත්ත්වය වාර්තා වීම අසාමාන්‍ය ලෙස වැඩි වෙලා. ඇතැම් පළාත්වල තිහක් හතළිහක් තරම් වැඩි අගයක් මේ රෝගය වැළඳුණු අය ඉන්න බවට වාර්තා වෙනවා. කොවිඩ් හැදුණු, දියවැඩියා තත්ත්වය තියෙන අයට මේ රෝගය වැඩියි. ඒ වගේම ස්ටීරොයිඩ් කාණ්ඩයේ ඖෂධ වලින් ප්‍රතිශක්තිය අඩු වීමත් මේ රෝග තත්ත්වය වැළඳෙන්න හේතු වෙනවා.
මේ දිලීරය ඇස උගුර කණ නාසය වගේ තැන්වල අභ්‍යන්තරයේ බොහොම සරුවට හැදෙන දිලීර වර්ගයක්. මේක මොළයට ගිහින් මැරෙන්නත් පුළුවන්. ඒ නිසා හමුවන රෝගීන්ගේ උගුරු කොටස් අයින් කරලා, ඇස් අයින් කරලා ටිකක් වේදනාත්මක සැත්කම් වලින් තමයි ඇතැම් ලෙඩුන්ව බේරාගන්නේ. මේ සඳහා දිනකට ඩොලර් 45ක් වෙන බේත් කෝස් එකක් තියෙනවා. ඒවා ඉන්ජෙක්ෂන් විදිහට දින දහයක් විතර මේ රෝගීන්ට නියම කරනවා. ඒත් ඒ බෙහෙත් මිල වැඩි වීම දුප්පත් ඉන්දියානුවන්ට ප්‍රශ්නයක්.
Saru FM Media
