ප්‍රතිජීවක ඔසු වැඩිපුර ලබාගැනීමෙන් ඇතිවෙන ඇන්ටිබයෝටික් රෙසිස්ටන්ස් (Antibiotic Resistance) කියන්නේ ඉදිරියට ලොව මුහුණපාන දරුණු ප්‍රශ්නයක්. දැනට තිබෙන සාමාන්‍ය ආසාදන රැසකට ඇන්ටිබයෝටික් වලින් විසඳුම් ලැබෙනවා. ඒත් වැඩිපුර ඇන්ටිබයෝටික් පාවිච්චි කළාම ඊළඟට හැදෙන ලෙඩ වලට දෙන්න තවත් ඇන්ටිබයෝටික් නැති වෙනවා. ඒ වගේම ඒ ඒ ඇන්ටිබයොටික් වලට ඔරොත්තු දෙන නව ක්ෂුද්‍ර ජීවීන් ඇති වෙනවා.
ඇන්ටිබයොටික් ගත්තාම මුල් කාලයේ හොඳට වැඩ කරනවා. ඒත් දිගටම හැම වෙලාවෙම එකම ඇන්ටිබයොටික් ගත්තාම ඒ අදාළ වෙන බැක්ටීරියාවන් එයට හුරු වෙනවා. එවැනි හුරු වීමේ ක්‍රම ගණනාවක් තියෙනවා. එකක් තමයි මේ ඖෂධ වලින් නැසෙන්නේ එක්තරා කොටසක් පමණයි. ඉන් පසු ඉතිරි වෙන පිරිස නැවත නැවත බිහිවෙලා තවත් ඊළඟට ඒ ඔසු වලට ඔරොත්තු දෙන අලුත් බැක්ටීරියාවන් බිහි වෙනවා.
තුන්වන ලෝකයේ සෞඛ්‍ය ආරක්ෂණ පද්ධති නිසි අයුරින් නැති රටවල වෛද්‍යවරුන්ට ඖෂධ ජාවාරම්කාර විශාල සමාගම් විසින් සියුම් ලෙස බලපෑම් කරනවා. ඔවුන් වෛද්‍යවරුන්ට සළකන්න ඔවුන්ට ඔසු හඳුන්වා දෙන්නට වෙනමම කණ්ඩායමක්ද පාවිච්චි කරනවා. ඒ හරහා සුළු ලෙඩකට ප්‍රතිකාර ගන්න ගියත් පෙති කරල් ගොඩක් ලබාදී ඉක්මනින් ලෙඩ හොඳ කරන වටපිටාවක් ඇතිකරන්නට මහන්සි ගන්නවා. ඒ තුළ වැඩි වැඩියෙන් ඖෂධම ලබාදෙන තත්ත්වයක් නිර්මාණය වෙනවා. මෙනිසා දුප්පත් රටවල ජනතාව ඇන්ටිබයොටික් යනු ඕනිම ලෙඩකට බෙහෙත් ගන්න ගිය විට ලැබෙන පෙති කරල් විශේෂයක් බවට විශ්වාස කරන තත්ත්වයට පත් වෙලා තියෙනවා.
සාමාන්‍ය ඉස්පිරිතාලයක කිසියම් වෙනමම විශේෂිත සායනයකට යන විට ඒ සඳහා සතියකට, මාසයකට වරක් දිනයක් ලැබෙනවා. ඒ දිනයට ගිහින් ඒ වරට අදාළ රෝග ලක්ෂණ සහ සුව වීමේ ගුණය අනුව නව ඔසු නියම කරනවා. එහෙත් චැනල් සෙන්ටර් සහ එවැනි එක්වරක් විශාල මිලක් ගෙවා රෝගියා පරීක්ෂා කරන ස්ථානයකට ගිය විට රෝගියාත් එකවර විශාල ප්‍රතිකාර රැසක් බලාපොරොත්තු වෙනවා. සායන මෙන් නැවත නැවත යළි යළිත් ඒමක් නොමැති බැවින් වැඩිපුර ඔසු රැසක් රෝගියාට එවැනි තැන් හරහා ලැබෙනවා.
Saru FM Media
