අද වෙනකොට ශ්‍රී ලංකාවෙන් සුපිරි ධනවතුන් රාශියක් බිහි වෙලා තිබ්බත් සියවසකට විතර කලින් ලංකාවේ එකම එක සුපිරි ධනවතයි හිටියේ, ඒ තමයි චාල්ස් හෙන්රි ද සොයිසා. Lifie මේ සටහන ඔහුගේ ජීවිතය දිහා නැවත හැරී බැලීමක්.
චාල්ස් ද සොයිසා ඉපදුණේ එවකටත් ලංකාවේ ධනවත් පවුලක් විදිහට සැලකුණු මොරටුව සොයිසා පවුලේ. චාල්ස්ගේ පියා වුණු ජෙරෝනිස් සොයිසා සහ ඔහුගේ මල්ලි වුණු සුසෙව් සොයිසා කරත්ත රස්සාවෙන් පටන් අරගෙන මිනිරන් පතල් කැණීම, කෝපි වැවීම සහ අරක්කු රේන්ද ගැනීම හරහා සෑහෙන තරමේ ධනවතුන් බවට පත් වෙලා හිටියා. සූසෙව් ද සොයිසාට දරුවන් නොමැති වීම නිසා ඔහුගේ බූදලයත් චාල්ස් හට උරුම වුණා. සිය දෙමව්පියන්ට නොලැබුණු බටහිර අධ්‍යාපන ලබාගත්ත චාල්ස් ද සොයිසා තමන්ට ලැබුණු බූදලය වැඩි දියුණු කිරීමට කටයුතු කළා.
චාල්ස් ද සොයිසා විවාහ වීමට තෝරාගත්තේ ලංකාවේ තවත් සුප්‍රකට ධනවත් පවුලකට අයිති සාමාජිකාවක් වුණු කැතරින් ද සිල්වාවයි. ඇගේ පියා වුණු ජුසේ ද සිල්වා පාප් වහන්සේගෙන් පවා ගෞරව ලැබූ භක්තිමත් කතෝලිකයෙකු වුණා. නමුත් මේ විවාහයට පරහකට හිටියේ චාල්ස් ද සොයිසාගේ පවුල ඒ වන විට බුද්ධාගම අත්හැරලා ඇන්ග්ලිකන් ක්‍රිස්තියානි නිකායට බැඳී සිටීමයි. විවාහයෙන් ලැබෙන දරුවන් කතෝලික ආගමේ බෞතීස්ම කරන බවට පොරොන්දුවක් ලබා දී ඒ විවාහය සිදු වුණත්, විවාහයෙන් ලැබුණු දරුවන් පාළොස් දෙනාම ඇන්ග්ලිකන් ක්‍රමයට අනුව බෞතීස්ම කරනු ලැබුවා.
තමන් සහ තමන්ගේ පවුලේ සාමාජිකයන් වෙනුවෙන් චාල්ස් ද සොයිසා මාලිගාවක් වැනි නිවසක් නිර්මාණය කළා. වර්තමාන කොල්ලුපිටියේ පිහිටා තිබූ මේ නිවස සහ ඉඩම අක්කර 120 ක ප්‍රමාණයක විහිදී ගියා. ගාලු පාරේ සිට තර්ස්ටන් පාර දක්වාත් බගතලේ පාරේ සිට පාසල් මාවත දක්වාත් ප්‍රදේශය ඊට ඇතුළත් වුණා. එවකට එම නිවස හැඳින්වූයේ බගතලේ වලව්ව නමින්. පසුකලෙක දී චාල්ස් ද සොයිසා විසින් තමන්ගේ දරුවන් වෙනුවෙනුත් ඒ ආසන්නයේම නිවාස ඉදිකළා. වර්තමානයෙහි කොළඹ සරසවියේ සනාතන සභාව පිහිටා තිබෙන ගොඩනැගිල්ල එසේ ඉදි කරන ලද වලව්වක්. (එවකට එය රෙජිනා වලව්ව ලෙස හඳුන්වා තිබෙනවා)
වික්ටෝරියා රැජිනගේ දෙවෙනි පුත්‍රයා වුණු එඩින්බරෝහි ආදිපාද ඇල්ෆ්‍රඩ් කුමාරයාගේ ලංකාගමනය වෙනුවෙන් චාල්ස් හෙන්රි ද සොයිසා විසින් සුවිශාල සාදයක් තමන්ගේ නිවසේ සැලසුම් කළා. ඒ සඳහා අවශ්‍ය ඇතැම් දෑ පිට රටින් පවා ගෙන ඒමට ඔහු කටයුතු කළා. ඇල්ෆ්‍රඩ් කුමාරයාට ආහාර ගැනීම සඳහා රනින් කළ පිඟන් සහ හැඳි ගෑරප්පු සකස් කරනු ලැබුවා. මෙය ලංකාව තුළ බ්‍රිතාන්‍ය රාජකීයයන් වෙනුවෙන් සිදු කරනු ලැබූ සුවිශාලම පිළිගැනීම ලෙස සලකනු ලබනවා. ඇල්ෆ්‍රඩ් කුමාරයාගේ මෙම පැමිණීම සිහිපත් කරමින් බගතලේ වලව්ව “ඇල්ෆ්‍රඩ් හවුස්” ලෙස නම් කරනු ලැබුවා. සංරක්ෂණය කළ යුතු සිහිවටනයක් වුණු ඇල්ෆ්‍රඩ් හවුස් නිවස සොයිසාගේ මරණයෙන් සිය වසක් ගත වීමටත් පෙර කඩා බිඳ දැම්මේ වර්තමානයේ දිවෙන ආර්. ඒ. ද මෙල් මාවත සඳහා ඉඩකඩ ලබා ගැනීම වෙනුවෙන්.
Saru FM Media
