අපි හැමෝම මූණ දීලා ඉන්නේ ශීඝ්‍රයෙන් පැතිරිලා යන ගෝලීය ව්‍යාප්ත වසංගතයකට කියන එක දැන් වෙනකොට අමුතුවෙන් කියන්න ඕන නැහැනේ. මේ වෙනකොට කොවිඩ්-19 වලින් බේරිලා ඉන්නේ පොඩි පොඩි දූපත් රාජ්‍ය කීපයක් වීතරයි. දැන් ලංකාවේත් ඇඳිරි නීතිය දාලා තත්වය පාලනය කරන්න උත්සාහ ගන්න අතරේ, ලෝකේ අනික් රටවලුත් යම් යම් ලොක් ඩවුන් ක්‍රමවේද වලට ගිහිල්ලා ඉන්නවා. කොහොම හරි කතාව ඒක නෙවෙයි, කතාව තමයි ෆේස්මාස්ක්ස්. ඇත්තටම ෆේස්මාස්ක් දාන්න අවශ්‍යද නැද්ද කියන එක ගැන මේ වෙනකොට තියෙන්නේ ලොකු අවුලක්. යම් යම් නීති ආයතන වලින් ඒක මුලින් අවුල් කලා, මාධ්‍ය ආයතන වලින් ඉතුරු ටිකත් අවුල් කලා. ආන්න ඒ නිසා තමයි අපි හිතුවේ මේ ෆේස් මාස්ක් කතන්දරේ මුල ඉඳලම පොඩ්ඩක් ලිහා ගන්න බලන එක හොඳයි කියලා.
අන්න හොඳ ප්‍රශ්නයක්. ඔය සම්බන්ධයෙන් ලෝක සෞඛ්‍ය සංවිධානය කියන්නේ මෙහෙමයි. ඔබ නීරෝගී පුද්ගලයෙක් නම්, ෆේස් මාස්ක් දාන්න ඕන ඔබ කොවිඩ්-19 රෝගියෙකුට හෝ කොවිඩ්-19 රෝගියෙක් බවට සැක කරන කෙනෙක්ට ඇප උපස්ථාන කරනවා නම් විතරයි. ඒ ඇරෙන්න ඔබට කැස්ස හෝ කිවිසුම් යෑම තියෙනවා නම් ඒත් ෆේස් මාස්ක් එකක් දාන්න ඕන. කොවිඩ්-19 රෝගී පුද්ගලයෙක් නම් ඉතින් ගෙදර ඉඳන් ෆේස් මාස්ක් දාලා හරියන්නෙ නෑ. කෙලින්ම හදිසි ඇමතුම් අංකෙකට කතා කරලා ඉස්පිරිතාලේ යන්න ඕන. 0710107107 හෝ 011307 103 අංක වලට කතා කරලා වැඩේ කරගන්නත් පුළුවන්.
හැබැයි තව එකක්. දැන් ඔය රට වටේ යන ඩිලිවරි සේවා තියෙනවනේ. ඔබ ඒ ඩිලිවරි සේවාවක් කරන කෙනෙක් නම්, ඒකත් එක්ක රට වටේ යන්න වෙලා නම්, ෆේස් මාස්ක් එකක් දාගෙන යන්න කියලා අදාළ අංශ වලින් කියනවා. ඒක පදනමක් තියෙන කතාවක්. ඒ නිසා එහෙම ඩිලිවරි යනවා නම් ෆේස් මාස්ක් දාමු.
දැන් පැහැදිලියිනේ. ඔබ නීරෝගී නම්, ඔබ කොවිඩ්-19 රෝගියෙකුට ඇප උපස්ථාන කරන්නෙත් නැතිනම්, ඉන්නේත් ගෙදරට වෙලා නම්, ෆේස් මාස්ක් දාන්න ඕන නෑ. හැබැයි මේ දවස් වල එලියට බහිනවා නම් මාස්ක් එකක් දාගෙනම එලියට යන්න කියලා පොලිසිය කියනවා කියලා ලංකාදීපේ කියනවා. ඒකත් මතකේ තියාගන්න.
හේතුව සරලයි. මේ වෙනකොට ලෝකේ ෆේස්මාස්ක් ඉල්ලුමට සැපයුම අඛණ්ඩව ලැබෙන්නේ නෑ. අපිට මතකයිනේ පහුගිය දවස් වල කාලෙන් කාලට ආපු ෆේස් මාස්ක් හිඟය. ඒ වගේම රුපියල් දහයට දෙන සරල සර්ජිකල් ෆේස් මාස්ක් එක කළු කඩ ගාණට විකුණන්නත් පටන් ගත්තා. දැන් එතකොට මොකද වෙන්නේ? පුළුවන් මිනිස්සු ෆේස් මාස්ක් අරගෙන ස්ටොක් කරගන්නවා. බැරි මිනිස්සු රට වටේ ෆේස් මාස්ක් හොයනවා. හැබැයි බරපතලම දෙය. මෙහෙම යනකොට ෆේස් මාස්ක් අවශ්‍ය වෙන ඉදිරි පෙරමුණේ සටන් කරන මිනිස්සුන්ට ෆේස් මාස්ක් නැතුව යනවා. ඉදිරි පෙරමුණ කිව්වේ වෛද්‍ය සේවා වල අයට සහ ලංකාවේ නම් ඊලඟට ආරක්ෂක සේවා වල අයට. අන්න ඒ අයට ෆේස් මාස්ක් දාන්න වෙනවා කියන එක සරලව තේරුම් ගන්න පුළුවන් කරුණක්නේ. දැන් ඒ අයටත් ෆේස් මාස්ක් නැති වුනහම, ඒ අය රෝගී වුනොත්, වෛද්‍ය සහ ආරක්ෂක සේවා බිඳවැටෙනවා. එතනින් එහාට චැප්ටර් ක්ලෝස්.
දෙවෙනියට, ෆේස් මාස්ක් එකෙන් වැඩේ ගොඩ කියලා හිතන කෙනෙක්ට බොරු ආරක්ෂිත හැඟීමක් ඇතිවෙන්නත් පුළුවන්. එතකොට එහෙම කෙනෙක් ඔය අත් හෝදනවා, මීටරේ දුරෙන් ඉන්නවා වගේ එව්වා ගණන් ගන්නෙත් නෑ. ෆේස් මාස්ක් දාපු රම්බෝ වගේ කොවිඩ්-19 එක්ක ගේමෙන් ඉන්න ගිහින් දන්නෙම නැතුව නවකොරෝනා වාහකයෙක් වෙන්න පුළුවන්.
දැන් ෆේස් මාස්ක් දාන්නම ඕන නම්, තමන් ගාව ෆේස් මාස්ක් තියෙනවා නම් ප්‍රශ්නයක් නෑ. හැබැයි ෆේස් මාස්ක් විතරක් දාලා කොවිඩ්-19 වලින් ආරක්ෂා වෙන්න බැහැ. නිතර සබන් හෝ සැනිටයිසර් යොදා හොඳින් අත් හේදීමත් කරන්න වෙනවා.
ඒ වගේම කොහොමද හරියට ෆේස් මාස්ක් පළඳින්නේ කියන එක ගැන දැනුවත් වෙන්න වෙනවා. මේ වීඩියෝ එකේ කියන්නේ ඒ ගැන තමයි:
Saru FM Media
