මහගම සේකර ජීවිතයට ආයුබෝවන් කියලා මේ අවුරුද්දේ ජනවාරි 14 වෙනිදාට අවුරුදු 42ක් පිරුණා. ගොඩක් දෙනා කවියෙක් විදියට විතරක් දන්න එතුමා ගේය පද රචකයෙක්, චිත්‍රපට අධ්‍යක්ෂවරයෙක්, නවකතාකරුවෙක්, කෙටිකතාකරුවෙක් සහ නාට්‍ය රචකයෙක් වෙනවා. ඔහුගේ නිර්මාණවල තිබුණේ ගැඹුරු අර්ථයක් හැබැයි ඉතා ම සරල සහ ලස්සන විදියට ඒක ඉදිරිපත් කරලා තිබුණා. මේ නිසා ම ශ්‍රී ලංකාවේ චිත්‍රපට ගීත සාහිත්‍යයේ හැරවුම් ලක්ෂ්‍යයක් විදියට එතුමා ව හඳුන්වන්න පුළුවන්. ඒ ගීතවල තිබුණ මිහිර නිසා ම අදටත් අපි ඒවා රස විඳිනවා. මේ ඒ වගේ ගීත නිර්මාණ කීපයක්.
1964 අවුරුද්දේ තිරගත වුණ ගැටවරයෝ චිත්‍රපටය මයික් විල්සන් සහ තිස්ස ලියනසූරිය යන අයගේ අධ්‍යක්ෂණයක්. ගාමිණී ෆොන්සේකා, ජෝ අබේවික්‍රම සහ සෝබනී අමරසිංහ වගේ විශිෂ්ට රංගධරයන් එකතු වුණ නිර්මාණයකට සේකරගේ පද මාලාවකින් යුත් ගීතයක් අමරදේවයන්ගේ සංගීතයෙන් එකතු වුණ එක අහම්බයක් නෙවෙයි. අදට අවුරුදු 50කටත් වඩා කලින් සමාජගත වුණ ගීයක් වුණත් අදටත් මේ ගීතය අමතක කරන්න අමාරුයි. සේකරගේ වචනවලට ඔහු බලාපොරොත්තු වුණ හඬ සැපයුවේ නාරද දිසාසේකර සහ පිරිස.
සිනමා වංශකතාවේ චිත්‍රපටයක ඇති සාරය එක ගීයකට කැටි කර ඇත්නම් ඒකට මෙයට වඩා උදාහරණයක් දෙන්න අමාරුයි. මේ ගීය රචනා කිරීම, ගීය ඇතුළත් චිත්‍රපටයේ තිර රචනය, ඊට පාදක වූ නවකතාව ලිවීම සහ චිත්‍රපටය අධ්‍යක්ෂණය යන සියල්ල කරන්නේ සේකර. ජාතික කතෝලික සිනමා පර්ෂදය 70 දශකයේ විශිෂ්ටතම සිනමා නිර්මාණය විදියට තෝරාගන්නේ මෙයයි. සේකර නාමය ඇති තැනක අමරදේව ශූරින් පිළිබඳ සඳහනක් නො වෙනවා නම් ඒක පුදුමයක්. අතීතයෙන් ගඟ ගලා බසී සංගීතවත් කරලා ගායනය කරන්නේ පණ්ඩිත් අමරදේව ශූරීන් විසින්.
1969 චිත්‍රපටයේ තිරගත වුණ බිනරමලී චිත්‍රපටයේ නිෂ්පාදනය, අධ්‍යක්ෂණය, කතාව සහ දෙබස් යන සියල්ලේ අයිතිකරුවා මුදලිනායක සෝමරත්න. චිත්‍රපටයේ නාමාවලියත් එක්ක ම ඇහෙන පසුබිම් ගීය තමයි ‘රටකින් රටකට පාර අසාගෙන’ කියන්නේ. මිනිස්සුන්ගේ කෙළවරක් නැති ජිවන ගමන ගැන හරි අපූරු කතාවක් කියන මේ ගීතය පණ ගැහෙන්නේ සෝමදාස ඇල්විටිගලයන්ගේ සංගීතයෙන් සහ අමරදේව මාස්ටර්ගේ මියුරු කටහඬින්. මේ ගීතයට 1970දී පැවති සරසවි සම්මාන උළලේදී හොඳම ගීත රචනයට සම්මානයක් හිමි වෙනවා.
Saru FM Media
