‘මදුරුවන්ට පුරුදු කරමු මල්පැණි බොන්න’ කියලා සිංදුවක් තියෙනවා. ඇත්තටම මදුරුවන්ට එහෙම පුරුදු කරන්නට විශේෂ දෙයක් නැහැ. උන් කොහොමත් බොන්නේ මල් පැණි. මදුරුවන් වැඩෙන්නේ ඒවායෙන්. ඒත් මදුරුවාගේ ගෑනු සතා සිය බිත්තර මෝරන්න සතුන්ගේ රුධිරය උරා බොනවා. ලොව පුරා මිනිසුන්ට එපාම කරපු සතෙක් වෙන මදුරුවා ගැන අපි කරුණු ටිකක් බලමු.
මිනිසාට වින කරන සතුන් අතර මාරාන්තිකම මට්ටමේ ඉන්නේ මදුරුවා. මදුරුවා කෙලින්ම බෝ කරන ලෙඩක් නැහැ. ඒත් මදුරුවා නිසා බෝවෙන දරුණු ලෙඩ රෝග රැසක් තියෙනවා. එයින් ඩෙංගු ලංකාවෙත් දරුණුවටම තියෙනවා. මැලේරියා දැන් අඩු වුණත් එක් කාලයකදී මැලේරියා කියන්නේ අපේ රටේ වියළි කලාපය බිලිගත් දරුණු උණ රෝගයක්. ඊට අමතරව කහ උණ, සීකා සහ ජැපනීස් එන්සපලයිටීස් මදුරුවන් නිසා බෝවන්නට පුළුවන් රෝග වෙනවා. මදුරුවන් නිසා අපේ බල්ලන්ටත් බෝවෙන්න පුළුවන් ලෙඩ රෝග ඇතිවෙනවා.
මදුරුවා මාස 5-6ක් තරම් දිගු ජීවිත කාලයක් තියෙන සතෙක්. ඒත් මදුරුවා සුහුඹුල් මදුරුවා විදිහට ඉන්නේ සති කිහිපයක් විතරයි. එයිනුත් අපිට විදින ගෑනු මදුරුවා ජීවත් වෙන්නේ සති තුනක් විතර. මේ මදුරුවන් බෝවීම ජීවන චක්‍රයක් මගින් සිද්ද වෙනවා. මදුරුවන් ජලයේ හෝ ජලාශ්‍රිත තැන් වල බිත්තර දානවා. ඉන් පසු මදුරු කීටයන් ඇතිවී ඒ මගින් මදුරුවන් බෝ වෙනවා. මදුරුවන් ශීත රටවලත් ඉන්නවා. එතකොට උන්ගේ බිත්තර ශීත කාලය පුරාවටම ආරක්ෂා වෙලා තියෙනවා මාස අටක් තරම් දිගු කාලයක්.
එක් එක් රෝග වාහක මදුරුවන් ගත්තත් එක් එක් රෝගයට විශේෂ මදුරුවන් ඉන්නවා. ඩෙංගු පතුරුවන මදුරුවා වැඩිවශයෙන් දිවා කාලයේ සැරිසරනවා. ඒත් මැලේරියා මදුරුවා බොහෝදුරට රෑට තමයි විදින්නේ. ඇතැම් මදුරුවන් හරකුන්ට, බල්ලන්ට වගේ විශාල සතුන්ට තමයි වැඩිපුර විදින්න කැමති. ඔවුන් මිනිසාට වැඩි කැමැත්තක් නැහැ. Culiseta melanura යන මදුරු විශේෂය කුරුල්ලන්ට තමයි වැඩිපුර විදින්නේ. ඉතාම කලාතුරකින් තමයි උන් මිනිස්සුන්ට විදින්නේ. Uranotaenia sapphirina වර්ගය විදින්නේ සර්පයින්ට.
Saru FM Media
