2018 වසරේ සිට කොන්ත්‍රාත් පදනම යටතේ ලංකා ගමනාගමන මණ්ඩලයේ සේවය කළ රියදුරු සහ කොන්දොස්තරවරුන් 1605 දෙනෙකු උදෙසා ස්ථීර පත්වීම් ලබා දීමේ සමාරම්භක වැඩසටහන ප්‍රවාහන මහා මාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතාගේ ප්‍රධානත්වයෙන් ජාතික ගමනාගමන කොමිෂන් සභා ශ්‍රවණාගාරයේදී පැවැත්වුණා.
එහිදී සංකේතාත්මක වශයෙන් 100කට අධික පිරිසකට ස්ථිර පත්වීම් ලිපි ප්‍රදානය සිදුවූ අතර සියලුම ස්ථිර පත්වීම්ලාභීන්ගේ ලිපි මේ වන විට සූදානම් කොට තිබෙනවා.
ලංගම ක්‍රිකට් කණ්ඩායම වෙත නිල ක්‍රීඩා ඇඳුම් කට්ටල පිරිනැමීමද මෙම අවස්ථාවට සමගාමීව සිදුකෙරුණා.
එහිදී අදහස් දැක්වූ අමාත්‍ය ආචාර්ය බන්දුල ගුණවර්ධන මහතා,
“ලංකා ගමනාගමන මණ්ඩලය විවිධ හේතු රාශියක සමස්ත ප්‍රතිඵලයක් ලෙස වසා දැමිය යුතු හෝ පුද්ගලික අංශය වෙත අලෙවි යුතු ආයතනයක් ලෙස ප්‍රතිපත්ති සම්පාදකයින් විසින් නම්කර තිබූ ආයතනයක්.
25000කට අධික අති විශාල සේවක පිරිස ඊට එක් හේතුවක්.
ආයතනය තුළින් විශාල මහජන සේවාවක් සිදුවුවත් ප්‍රමාණවත් ආදායමක් උපදවාගත නොහැකිනම් එය පවත්වාගෙන යා නොහැකි තත්ත්වයක් මතු වෙනවා.
එම නිසා ආර්ථිකය කඩා වැටීමෙන් අනතුරුව 2025 වසර වන විට ආයතනය ලාභ ලබන තත්ත්වයට පත් කිරීම පිළිබඳව මහා භාණ්ඩාගාරය සමඟ ගිවිසුමකට එළඹීමට අපට සිදුවුණා. ඒ අනුව සිදුකළ කලමණාකරණ වෙනස්කම් තුළ කිසියම් ප්‍රගතියක් මේ වනවිට අත් කරගෙන තිබෙනවා.
නමුත් තවමත් ආයතනය ඉතාමත් හොඳ ස්ථාවර මට්ටමකට ළඟා වී නැහැ.
ඒ තත්ත්වයට ලඟා වීම පිළිබඳ වගකීම සමස්ත කාර්ය මණ්ඩලයටම පැවරෙනවා.
ඒ වෙනුවෙන් සෑම ඩිපෝවක්ම ලාභ ලබන , පාඩු නොලබන තත්ත්වයට පත් කළ යුතුයි. එහිදී කොන්දොස්තර මහත්වරුන්ට සහ රියදුරු මහත්වරුන්ට විශේෂ කාර්යභාරයක් පැවරෙනවා.
මේ වන විට ගණන් බලා ඇති ආකාරයට දිනකට ලක්ෂ සීයක පමණ ලැබිය යුතු ආදායම ලංගමට අහිමි වී යනවා.
ඒ අනුව මින් ඉදිරියට ප්‍රවේශපත්‍ර නිකුත් කරන මුදලින් ශත පනහක හෝ හිඟයක් සිදු වුවහොත් වහාම සේවය තහනම් කිරීමට කටයුතු කිරීමට පියවර ගනු ඇති.
අකමැත්තෙන් වුවත් මෙවැනි ක්‍රියාමාර්ග වලට එළඹෙමින් ලංගම ගලවා ගැනීමට කටයුතු කිරීමට සිදුව තිබෙනවා.
කිහිප දෙනකු විසින් සිදු කරන වැරදි ක්‍රියාවක් හේතුවෙන් අති විශාල පිරිසකගේ ජීවනෝපාය පිළිබඳ ගැටලුවක් මතුවනවා.
90% පමණ යහපත් සේවකයින්ගේ සුරක්ෂිතතාවය වෙනුවෙන් දුෂ්චරිතයේ නිරතවන 10% පිරිස පිළිබඳව දැඩි තීන්දු තීරණ ගැනීමට සිදුවනවා.
මේ තත්ත්වය සියලු දෙනාම තේරුම් ගත යුතුයි.
රටේ අනෙකුත් බැංකු ඇතුළු මූල්‍ය ආයතනද කටයුතු කරන්නේ එවැනි ආකාරයටයි.
ඒ තත්ත්වය ලංගම තුළද ක්‍රියාත්මක කරන අතර ඉදිරියේදී නව තාක්ෂණික ක්‍රමවේද භාවිතා කිරීමටද කටයුතු කිරීමට සැලසුම් කර තිබෙනවා.
සියලු දෙනා එලෙස කැපවීමෙන් එක් වසරක් වැඩ කළහොත් ආයතනය පවතින තත්ත්වයෙන් ඉහළට ගෙන එමින් ලාභ ලබන තත්ත්වයට පත් කළහොත් එම ලාභයෙන් කොටසක් ද කාර්ය මණ්ඩලය වෙත බෙදා හැරීමට අප බලාපොරොත්තු වෙනවා.
එකම ගාස්තුව අය කරන පුද්ගලික බස් රථ හොඳ ආදායමක් ලබා ගනිමින් තමන්ගේ තත්ත්වය තවදුරටත් වර්ධනය කර ගනු ලබනවා.
ඊටත් වඩා විශ්වාසයකින් යුතුව ජනතාව ලංකා ගමනාගමන මණ්ඩලයේ බස් රථ භාවිතා කළත් එලෙස ආදායමක් නොලැබෙන්නේ ප්‍රවේශපත්‍ර නිකුත් කිරීමේදී සිදුවන විවිධ අක්‍රමිකතා හේතුවෙන්.
එම නිසා එම තත්ත්වයට පත් නොවී ගෞරවාන්විත සේවයක් ජනතාවට ලබා දෙමින් ආයතනයේ දියුණුව වෙනුවෙන් කැපවී මානව හිතවාදී සේවක පිරිසක් ලෙස කටයුතු කිරීම සියලු දෙනාගේම වගකීමක් බවට පත්වනවා.”
ලංකා ගමනාගමන මණ්ඩලයේ සභාපති ලලිත් ද අල්විස් මහතා, ප්‍රධාන විධායක නිලධාරි මහේෂ් කුලතිලක මහතා,නියෝජ්‍ය සමාන්‍යධිකාරී (පාලන ) අවන්ත අමරවීර මහතා, ආරක්ෂක හා විමර්ෂණ අධීක්ෂණ නිලධාරී ලක්ෂ්මන් අබේකෝන් මහතා ඇතුළු නිලධාරීන්, පත්වීම් ලාභීන් ඇතුළු පිරිසක් මෙම අවස්ථාවට එක්ව සිටියා.
Saru FM Media
