ලිපි හුවමාරු විජ්ජා ඕනේ නැති බවත් මැයි මාසයේ විවාද දෙකටම තමා සූදානම් බවත් විපක්ෂ නායක සජිත් ප්‍රේමදාස පවසනවා.
විපක්ෂ නායකවරයා මේ බව ප්‍රකාශ කළේ සක්වල සුහුරු පන්ති කාමර ලබාදීමේ වැඩසටහනේ 163 වැනි අදියර යටතේ අද (02) හම්බන්තොට, වීරකැටියේ, ඕකන්දයාය මහා විද්‍යාලයට රුපියල් ලක්ෂ 10ක් වටිනා සුහුරු පන්ති කාමරයක් ලබා දීමේ අවස්ථාවට එක්වෙමිනි.
ආර්ථික විශේෂඥයන් අතර විවාදය බැහැ කියන්නේ ඔවුන්ගේ ආර්ථික විශේෂඥයන්ට වැඩ බැරි නිසා ද කියා ගැටලුවක් පවතින බවත් එම නිසා ලිපි හරබ නොකර මැයි මාසයේ විවාද දෙකම කිරිමට එන ලෙසත් වාද විවාද පවත්වනවා සේම ඊට පෙර කයිය වගේම වැඩක් කර පෙන්වන ලෙස යෝජනා කරන බවත් රටට අවශ්‍ය කයිය නායකයෝ නොව වැඩ කරන නායකයෝ බවත් විපක්ෂ නායකවරයා පැවසීය.
ජනතාවට කයිය, බොරුව, සෝබනය, ඔලුගෙඩි විජ්ජා එපා වී ඇති බවත් කතාවට මෙන්ම වැඩටද සමගි ජන බලවේගය සූදානම් නිසා බය නැතිව එන ලෙසත් විපක්ෂ නායකවරයා එහිදී අවධාරණය කළා.
සිංහල පමණයි දමිළ පමණයි කියන අය කරන්නේ තමන්ගේ ඡන්ද මල්ල පුරවා ගැනීම මිස අධ්‍යාපනය දියුණු කිරීම නොවන බවත් මේ නිසා පාසලින් විශ්වවිද්‍යාලයෙන් පිටවන දරුවා රැකියා නොමැති විරැකියා පෝළිමට එකතු වන බවත් මේ ක්‍රමය වෙනස් විය යුතු බවත් විපක්ෂ නායකවරයා සඳහන් කළා.
පාසල් අධ්‍යාපනය තුළ ව්‍යවසායකයන් බිහි කිරීමේ දැනුමද ලබා දිය යුතු බවත් අධ්‍යාපනය කරන ගමන් ව්‍යවසායකයන් බිහි කිරීමේ දැනුම ලබා දී ව්‍යවසායකයන් මිලියනයක් බිහි කළ යුතු බවත් ඒ වෙනුවෙන් අවශ්‍ය කාරක ප්‍රග්ධනය, ප්‍රග්ධනය,සම්පත්, දරාගත හැකි පිරිවැයකට මූල්‍ය ප්‍රවේශය ලබා දෙන බවත් විපක්ෂ නායකවරයා පැවසීය.
අපේ අරමුණ ඩිජිටල් ශ්‍රී ලංකාවක් නම් තොරතුරු තාක්ෂණ විෂය 1-13 විය යුතු බවත් එය යම් ප්‍රමාණයකින් පෙර පාසල තුළත් ලබා දිය යුතු බවත් විපක්ෂ නායකවරයා පැවසීය. අපේ රටේ අධ්‍යාපන ක්‍රමය දින 7ම දවස් 365ම කටපාඩම් අධ්‍යාපනය බවත් ඉන් දරුවන්ට රටට අනාගතයක් නොමැති නිසා අධ්‍යාපනයේ වෙනස සිදු කළ යුතු බවත් විපක්ෂ නායකවරයා වැඩිදුරටත් ප්‍රකාශ කළේය.
Saru FM Media
