මේ ලිපි පෙළ නම් කවදාවත් ලියලා ඉවර කරන්න පුළුවන් ලිපිපෙළක් වෙයිද කියන එක අපිට නම් ප්‍රශ්නයක්. මොකද ඒ තරම් අපේ රටේ ප්‍රසිද්ධ චරිත කට වරද්දගෙන නාගෙන තියෙනවා .එහෙමනම් වැඩි විස්තර කතා කරන්නැතුව අපි මේ කටවරද්දා ගැනීම් ගැන හොයල බලමු. අමතක කරන්න එපා අපිට තියෙන්නෙ එක කටයි. ඒ කට පරිස්සමෙන් පාවිච්චි කරන්න ඕන.
මේ සිදුවීම නම් කට වරද්දාගැනීමක් නෙමෙයි කියලා අපිට වගකීමකින් යුතුව ප්‍රකාශ කරන්න පුළුවන්. හැබැයි අපි එතුමියගේ මේ සිදුවීම මේ ලිපියට ඇතුළත් කරන්න හිතුවේ ඔබටත් යමක් ඉගෙන ගන්න පුළුවන් කියලා හිතලා. මීට වසර දෙකකට විතර කලින් කොළඹ මහ නගර සභාවේ අයවැය ඉදිරිපත් කරද්දි කරද්දී ඇය විසින් “එක් බිලියන” වශයෙන් කරපු සඳහන් කිරීම සමාජ මාධ්‍ය වල දැඩි ලෙස හාස්‍යයට ලක්වුණා ඔබට මතක ඇති. නමුත් බොහෝ දෙනෙක් නොදන්නවා වුණාට අද වන විට සංඛ්‍යා කියවීමේ සම්මත ක්‍රමය වන්නේ එයයි. මෙය පාසල් පෙළ පොත් වලටත් ඇතුළත් වෙලා තියෙනවා. ඒ නිසා ඔබත් ඇයව හාස්‍යයට ලක් කළ කෙනෙක් නම් මේ පිළිබඳව හොයා බලන්න කියන එක අපි ඉල්ලා සිටිනවා.
පාස්කු ප්‍රහාරය සිදු වූ අවධියේදී ආරක්ෂක ලේකම්වරයා විදිහට කටයුතු කරපු හේමසිරි ප්‍රනාන්දු මුළු රටේම අප්‍රසාදයට පත් වෙන්න ඔහුට සිදුවුණු මේ කට වරද්දගැනීම හේතු වුණා. මාධ්‍යවේදියෙක් සිදු කරපු විමසීමකදී ඔහු සඳහන් කළේ “ගහනවා කියලා දැනං හිටියා… හැබැයි මේ විදිහට ගහයි කියලා හිතුවේ නෑ” කියලායි. මේ ප්‍රකාශය දෙස් විදෙස් මාධ්‍ය වල දැඩි කතා බහට ලක් වුණු අතර වගකිවයුතු රාජ්‍ය නිලධාරියෙකු ලෙස මෙවැනි ප්‍රකාශ කිරීමක් පිළිබඳව ඔහුට දැඩි ලෙස විවේචන එල්ල වුණා .
මෑත කාලයේ සිට ලංකා දේශපාලනයේ කැපී පෙනෙන චරිතයක් බවට තමන්ව පත් කර ගැනීමේ දැඩි උත්සාහයක යෙදී සිටින මිලින්ද රාජපක්ෂ, පසුගිය දවසක විශාල කට වරද්දාගැනීමක් සිදු කර ගත්තා. ඒ ඔහු එක්තරා ප්‍රසිද්ධ මාධ්‍ය වැඩසටහනකට සහභාගී වෙමින් සිංගප්පූරුවේ වැසියන්ට කිරි පවා නොමැති තත්ත්වයක් ඇතිවී තිබෙන බවට ප්‍රකාශ කිරීම නිසයි. මීට සිංගප්පූරුවේ වෙසෙන ශ්‍රී ලාංකිකයින් හාස්‍යජනක ලෙස ප්‍රතිචාර ලබා දී තිබුණා. ඔවුන් විසින් ඇතැම් අවස්ථාවල තමන් ආහාරයට ගන්නා දේ පිළිබඳව වීඩියෝ පවා සමාජ මාධ්‍ය ජාලා වලට එකතු කරලා තිබුණා.
Saru FM Media
