හතර පයින් ඇවිදින ලොම් සහිත මේ යාලුවො ඉතින් කොහොමත් දුර්ලභ ගති ගුණ වලින් හෙබි අය තමයි. ඒකෙ දෙකක් නෑ. මිනිහාගේ හොඳම මිතුරා වෙන මේ සුනඛයන් අතරත් ඉතාම ජනප්‍රිය සුනඛ වර්ග තියනවා. අපේ රටේ සුනඛ සුරතලුන් ගත්තොත් ජර්මන් ෂෙපර්ඩ්, රොට්වෙයිලර්, ගෝල්ඩන් රිට්‍රීවර්, ලැබ්‍රඩෝර්, ඩැල්මේෂන් වගේ සුනඛ වර්ග මෙහෙ ඉතාම ජනප්‍රියයි. හැබැයි අපි අද මේ ලිපියෙන් කියන්න යන්නේ ජනප්‍රිය අය ගැන නම් නෙමෙයි, ලෝකයේ ඉතාම දුර්ලභම සුනඛ වර්ග ගැනයි. මේ කියන්න යන වර්ගවල සුනඛ සුරතලෙක් ඔයා ගාව එහෙම ඉන්නවනම් අපිට කමෙන්ට් එකකින් කියන්නත් අමතක කරන්න එපා ඔන්න.
බ්‍රිතාන්‍යය තමයි ඔටර්හවුන්ඩ්ගේ ජන්ම භූමිය. බොහොම මිත්‍රශීලී ගති ලක්ෂණ තියන මේ කට්ටිය ටිකක් විතර ඇඟපතින් විශාලයි වගේම පිහිනන්නත් දක්ෂයො. දඩයම් සුනඛයන් හැටියට තමයි මේ වර්ගයේ අයව මුලදි හරි හරියට යොදාගෙන තියෙන්නෙ. පස්සේ කාලෙක මේ අයව යොදාගෙන දඩයම් කරන එක ඒ රටේ තහනම් කළාට පස්සේ තමයිලු ඔටර්හවුන්ඩ්ලාට නරක දසාවක් ලබන්න පටන්ගෙන තියෙන්නෙ. මේ වෙද්දි ලෝකයේම ඉන්නෙ ඔටර්හවුන්ඩ්ලා 800කටත් අඩු ප්‍රමාණයක් කියලයි කියන්නෙ. ලංකාවෙ මුදලින් ගත්තොත් අඩුම තරමේ රුපියල් ලක්ෂ 3ක්වත් මේ අය වටිනවා කියලයි දැනගන්න ලැබෙන්නෙ.
ලෝකයේ ඉපැරණිම සුනඛ වර්ගයක් තමයි මේ කේනන් සුනඛයන්. ඈත අතීතයේ මැද පෙරදිග මේ සුනඛ වර්ගය ජීවත් වුණාය කියලා පුරාණ ලිඛිත සාක්ෂි පවා තියනවා. ඒ විතරක් නෙමෙයි ඊශ්‍රායෙලයේ ජාතික සුනඛයා හැටියට සැළකෙන්නෙත් මේ කේනන් සුනඛයාව තමයි. මිනිස්සුත් එක්ක ෂේප් එකේ ඉන්න ඩයල්ස් එකක් වෙන මේ සුනඛයා හරිම බුද්ධිමත් සතෙක් කියලයි දැනගන්න ලැබෙන්නෙ. ඒ වගේම හොඳ ඇලර්ට් එකේ ඉන්න තද බුලට් එකක් කියලත් කියනවා. හැබැයි මෙයාල අනිත් සුනඛ වර්ග සහ බළල්ලු වර්ග එක්ක ටිකක් ගේමෙන්ලු ඉන්නෙ. ඊශ්‍රායෙලයේ ජාතික සුනඛයා වුණාට මේ වර්ගයේ සුනඛයො මුලු ලෝකෙටම ඉන්නෙ 1600ක් වගේ ගාණක් කියලයි දැනගන්න ලැබෙන්නෙ. සාමාන්‍යයෙන් මේ සුනඛ වර්ගයෙත් මිල රුපියල් ලක්ෂ එකහමාරකට වඩා උඩින් තමයි තියෙන්නෙ.
නෝර්වේ රට තමන්ගේ වාසස්ථානය කරගත්ත මේ සත්වයා අපූරු ශරීර ලක්ෂණ කීපෙකටම උරුමකම් කියනවා. මෙයාගෙ හැම කකුලකම ඇඟිලි 6 ගාණෙ තියනවා. ඒ වගේම මෙයාට බෙල්ල පිටිපස්සට නවන්නටත් හැකියි. කකුලේ ඇඟිලි වැඩි නිසාමද මන්දා මෙයා කඳු නගින්න උපන් හපනෙක්. ඉස්සර කාලෙ මෙයාලගෙ ප්‍රධාන රාජකාරිය වෙලා තිබ්බෙ පෆින් කියන මුහුදු පක්ෂියාවත් උගේ බිත්තරත් දඩයම් කරන එකයි. ඒත් පස්සෙ කාලෙකදි වෙනත් දඩයම් ක්‍රම පැමිණීමත් එක්ක ලන්ඩහන්ඩ්ලාත් ටිකෙන් ටික දුර්ලභ වෙන්න පටන් අරන් තියනවා. දෙවෙනි ලෝක යුද්ධ කාලෙ වෙද්දි මේ අය සහමුලින්ම වඳවී යන්නත් ගිහින් තියනවා. කොහොමින් කොහොම හරි අද වෙද්දි මුලු ලෝකෙටම මේ ලන්ඩහන්ඩ් සුනඛයින් 2000කටත් අඩු ගාණක් තමයිලු ඉන්නෙ. සාමාන්‍යයෙන් මේ සුනඛයෙක් රුපියල් ලක්ෂයකට ආසන්න ගාණක් වෙන බවයි දැනගන්න ලැබෙන්නෙ.
බටහිර අප්‍රිකානු රටවල පැතිරිලා ඉන්න සුනඛ වර්ගයක් තමයි මේ ඈසවක් කියන්නෙ. සහරාව ආශ්‍රිතව ජීවත් වෙච්ච නොයෙකුත් ගෝත්‍ර එක්ක තමයි ඈසවක් සුනඛයා මුල් අවධියේදී සෙට් වෙලා ඉඳල තියෙන්නෙ. දිග කකුල් වලින් සහ කෙටි ලොම් වලින් යුක්ත මේ සත්වයා මිනිස්සුන්ට ඉතාම හිතවන්තව ජීවත් වෙන සතෙක්. ඒ වගේම හොඳ අවධානෙන් ඉන්න මුර බල්ලෙක් හැටියටත් මෙයා ප්‍රසිද්ධයි. මේ එක් සුනඛයෙක් අඩුම වශයෙන් ඇමරිකානු ඩොලර් 1000ක් සිට ආරම්භ වන මිලකට තමයි අලෙවි වෙන්නෙ. අද වෙද්දි මේ වර්ගයේ සුනඛයනුත් ලෝකේම ඉන්නෙ දහස් ගණනක් විතරයි.
Saru FM Media
