කෘෂිකාර්මික IoT විසඳුම් ක්ෂේත්‍රයේ ප්‍රමුඛයා වන govi.ai, මාර්තු 29 සිට 31 දක්වා කොළඹ BMICHහිදී පැවති Future Harvest ප්‍රදර්ශනය අතරතුර නව්‍ය කෘෂි තාක්ෂණ විසඳුම් රැසක් දැක ගැනීමට නරඹන්නන්ට අවස්ථාව සළසා දී තිබිණි. කුඩා ඉඩම් හිමි ගොවීන් මෙන්ම වාණිජ වගාවල නිරත වන ගොවීන් අතර දත්ත පදනම් කර ගත් තාක්ෂණික විසඳුම් භාවිතය ප්‍රවර්ධනය සඳහා නිර්මාණය කර ඇති තාක්ෂණික විසඳුම් සජීවී ප්‍රදර්ශනාගාරයක් තුළ දැක ගැනීමට නරඹන්නන්ට අවස්ථාව හිමි විය. එම ප්‍රදර්ශන කුටිය වෙත පැමිණි නරඹන්නන් අතර පාර්ලිමේන්තු මන්ත්‍රී ආචාර්ය හර්ෂ ද සිල්වා මහතාද වීම විශේෂත්වයකි. “නවීන තාක්ෂණය පදනම් කර ගත් කෘෂිකාර්මික කටයුතුවල නිරත වන ගොවියෙක් ලෙස මට කියන්න පුලුවන් govi.ai නිර්මාණය කර ඇති තාක්ෂණික විසඳුම් ගොවීන්ගේ කාර්යක්ෂම බව ඉහළ නංවන්න විශාල දායකත්වයක් දෙන බව. ගොවීන්ගේ ඵලදායිතාව ඉහළ නංවන්න කෘෂි තාක්ෂණ විසඳුම් අත්‍යවශ්‍යයි. තාක්ෂණය සම්බන්ධයෙන් එතරම් කැමැත්තක් දක්වන්නේ නැති ගොවීන්ට පවා තාක්ෂණයේ සැබෑ වාසි මොනවාද කියලා අවබෝධ කර ගන්න මේ විසඳුම් උපකාරී වේවි.” ආචාර්ය හර්ෂ ද සිල්වා මහතා පැවසීය.
සැළසුම් කිරීම, නිෂ්පාදනය කිරීම සහ එකලස් කිරීම යන සියලු දෑ ශ්‍රී ලංකාව තුළ සිදු කළ IoT විසඳුම් සමඟ ගොවීන් සහ ගොවිපොළ පවත්වා ගෙන යන පුද්ගලයන් බල ගැන්වීමට govi.ai ආයතනය කටයුතු කරයි. එම විසඳුම්වල අන්තර්ගත ඒකාබද්ධ කරන ලද සංවේදක සහ පාලක මඟින් දුරස්ථව සහ ස්වයංක්‍රීයව වගා බිම් නිරීක්ෂණය කිරීමට සහ කළමනාකරණය කිරීමට ගොවීන්ට අවස්ථාව ලැබේ. එම විසඳුම් සමඟ උෂ්ණත්වය, ආර්ද්‍රතාව, ආලෝකය, සම්පත් භාවිතය, ඔක්සිජන් සහ තවත් බොහෝ දෑ ඇතුළත් ගොවිපොළ (විවෘත ක්ෂේත්‍රය, පොලි උමං, හරිතාගාර) තත්ත්ව නිරීක්ෂණය කළ හැකි අතර බෝග වගා කිරීම, අස්වනු නෙලීම සහ පොහොර හා විදුලිය වැනි සම්පත් කළමනාකරණය කිරීම සඳහා අවශ්‍ය කාලීන තොරතුරුද ගත හැකිය. පාරිභෝගිකයන්ටද ඔවුන් මිල දී ගන්නා නිෂ්පාදන පිළිබඳව නිවැරදි තොරතුරු ගැනීමට මෙම විසඳුම් උපකාර වේ. මෙම අවස්ථාවේ අදහස් දක්වමින් Azend Technologies සමාගමේ ප්‍රධාන විධායක නිලධාරී සහ අධ්‍යක්ෂ රජිව් සිල්වා මහතා මෙලෙස පැවසීය. “ශ්‍රී ලංකාවේ වඩාත් වැදගත් ක්ෂේත්‍රවලින් එකක් වන කෘෂිකර්මාන්තය සඳහා අවශ්‍ය govi.ai වැනි තාක්ෂණික විසඳුම්වල වැදගත්කම ඉස්මතු කරන්න මේ ප්‍රදර්ශනය විශාල පිටිවහලක් වුණා. තිරසාර සහ දත්ත පදනම් කර ගත් විසඳුම් තුළින් ප්‍රජාව සවි බල ගන්වන්න වගේම වගා බිමේ සිට කෑම මේසය දක්වා වන සමස්ත වටිනාකම් දාමය ඒකාබද්ධ කරන්න අප ඉදිරියටත් කැප වෙනවා.” 2023 NBQSA ජාතික තොරතුරු තාක්ෂණ සම්මානය ජයග්‍රහණය කිරීම සහ එක්සත් රාජධානියේ සහ එක්සත් අරාබි එමීර් රාජ්‍යයේ පැවති ලෝක කෘෂි තාක්ෂණ නවෝත්පාදන සමුළුවේදී ශ්‍රී ලාංකික කෘෂි තාක්ෂණ ක්ෂේත්‍රය නියෝජනය කිරීම තුළින් දේශීය මෙන්ම ජාත්‍යන්තර වශයෙන්ද කීර්තියක් ලැබීමටද Azend Technologiesහි නිෂ්පාදනයක් වන govi.ai සමත් වී තිබේ. govi.ai සහ ඒ තුළින් ඔබේ කෘෂිකාර්මික මෙහෙයුම් වැඩි දියුණු කර ගත හැකි ආකාරය පිළිබඳ තොරතුරු www.govi.ai වෙබ් අඩවියට පිවිසීමෙන් ගත හැකිය.
Saru FM Media
