අපිට අභ්‍යාවකාශයේ කෙළවර හොයන්න අමාරුයි. ඒත් අපි හරියට අපේ මහ පොළව ගැනවත් හරිහැටි දන්නවද? අඩුගාණේ මූදු පතුල ගැනවත්? ගොඩබිම වගේම මුහුදු පතුලත් ජීවීන් ගොඩක් ඉන්න සුන්දර පරිසරයක්. කිමිදුනොත් අපිට මේ පරිසරය ලේසියෙන් බලන්න පුළුවන්. නොගැඹුරු මුහුදේ කිමිදෙන එක ලංකාවේ ජනප්‍රිය විනෝදාංශයක් නෙමෙයි. ඒත් ලංකාවට එන සංචාරකයෝ නම් කිමිදිලා, අපේ මුහුදේ තියෙන ලස්සන ඇස් දෙකෙන්ම දැකබලාගෙන යනවා.
ඒක අපි කිමිදෙන්න ඉන්න සයිට් එක අනුව වෙනස් වෙනවා. හොඳම දේ තමයි ඒ කාලය ගැන අපි කිමිදෙන්න ඉන්න තැන කට්ටියගෙන්ම අහගන්න එක. හොඳම කාලෙක වුණත් එකපාර බෙංගාල බොක්ක සවුත්තු වෙලා වැස්ස කඩන් වැටෙන තත්ත්වයක් ආවොත් ආං ඒ දවස් මග අරින එක හොඳයි. අනික මූද සැර කාලෙට මූද යට විසිබිලිටි, එහෙම නැත්තම් පාරදෘෂ්‍යතාවය අඩුයි. එතකොට අපිට මුහුද යටදි දුර පේනවා අඩුයි. ඒ නිසා කිමිදෙන්න පුරුදුවෙන්න හොඳ කාලය අහලා දැනගෙන, කාලගුණයත් බලලාම වැඩේ පටන් ගන්න ඕනි.
මුලින්ම අපි කිමිදෙන්න යද්දි අපි කිසි දෙයක් දන්නේ නැහැ. ඒ නිසා අපි මුලින්ම හොඳට ඉගෙනගන්න ඕනි. කිමිදෙන වැඩේට ලංකාවෙදි නම් බොහෝවිට එක සෙෂන් එකකට රුපියල් පන් හයදාහකට වඩා ගාණක් වියදම් වෙනවා. ඒත් මිල කියන සාධකය මත පමණක් සලකලා අපි තත්ත්වයෙන් බාල තැනක් හොයාගන්න හොඳ නැහැ. මොකද අපි මුලින්ම කිමිදෙනකොට ඒ ආම්පන්න, ඇඳුම්, සිලින්ඩරය, කිමිදීමේදී අනුගමනය කරන්න ඕනි ක්‍රම සහ විධි ආදිය ගැන ඉගෙනගන්න ඕනි. ඒ නිසා මුල්ම දවස් කිහිපයටවත් හොඳ සහතික ලත් කිමිදෙන්නන් විසින් කරුණාවන්තව පුහුණු කරවන තැනක් කිමිදෙන්න පුරුදුවෙන්න සොයාගන්න ඕනි.
මූද යට ලෝකයත් පොළව මත ලෝකයට ආසන්නව සමානයි. අපි වනෝද්‍යානයක අලි, කොටි, වලස්සු ගොඩක් දැක්කත් එයාල පහර දීපු අවස්ථා බොහෝම අඩුයි. ඒ වගේ ඉතාම කලාතුරකින් හැර මෝරු සහ වෙනත් මුහුදු සතුන් මිනිස්සුන්ට ඇටෑක් කරපු අවස්ථා අඩුයි. ඔස්ට්‍රේලියාව වගේ රට වල මුහුදු සර්පයින්, විෂ සහිත මකුළුවන්, කකුළුවන් ආදීන්ගේ පහරදීම් වාර්තා වෙලා තියෙනවා. ඒත් ලංකාවේ නම් කිමිදෙන අය අතර එහෙම සිද්ධි වාර්තා වෙලා තියෙන්නේ ඉතාමත්ම කලාතුරකින්. ඒ නිසා ලංකාවේ මූදේ කිමිදෙනකොට පතුලේ ඇනෙන්න පුළුවන් ඉකිරි වගේ දෙයකින් හැර මුහුද තුළ ඉන්න සතුන් සම්බන්ධයෙන් ගොඩාක් බයවෙන එක තේරුමක් නැහැ.
පිහිනීම, වෝටර් රාෆ්ටින් ආදී ජල ක්‍රීඩා ගොඩක් දැනගෙන ඉන්න කෙනෙක් වුණත් කිමිදෙන වැඩේදි මුල ටික හොඳට පුරුදු වෙන්න ඕනි. මොකද වතුර යට තියෙන තත්ත්වය අනුව ඒ අදාළ උපකරණ හසුරුවාගන්න එක ගේමක්. ඒ වගේම කටින් හුස්මගැනීම, අපේ ගොගල්ස් සුද්ද කරගැනීම, අනතුරුදායක තත්ත්වයන් ගැන අවධානය යොමු කිරීම, වතුරේදී සංඥා හුරු වීම වගේ දේවල් අපි පුරුදු වෙන්න ඕනි.
Saru FM Media
