රට රටවල කෑම බීම කලින් කලට වෙනස් වෙනවා. ඒ කෑම බීම රටාවන් කෙරේ බලපාන විවිධ සාධක තියෙනවා. ලංකාවයි ඉන්දියාවයි වෙන් වෙලා තියෙන්නේ කිලෝමීටර 32ක පටු මුහුදු තීරයකින්. අපි ඔය මුහුදු තීරයෙන් එතෙර වෙලා දකුණු ඉන්දියාවට ගියොත් එහි කෑම රටාවන් අපේ කෑම කන රටාවට වැඩිය වෙනස් ආකාරයක් ගන්නවා. ඒ දකුණු ඉන්දියාවේ ආභාෂය තියෙන යාපනේට ගියත් ඒ වෙනස ලාවට අපිට දැකගන්නට පුළුවන්. ඒ කෑම බීම වෙනස්කම් සහ ඒවාට හේතු අපි ටිකක් හොයාබලමු.
ඉන්දියාව සහ අපේ රට වගේ යටත්විජිත රටවල් ගත්තොත් ඒ රටවල කෑම වලට අපිව යටත් කරගෙන හිටපු ජාතීන්ගේ ආභාෂය කෙළින්ම ලැබිලා තියෙනවා. කොකිස්, කැවුම්, දොදොල් වගේ ආහාර දැනට අපේ අපේ කියලා ආහාරයට ගත්තට ඇත්තටම ඒවා අපිට යටත්විජිත කාලේ ලැබුණු දායාදයන්. ඒ වගේම අපි වගේ සමාජ පසුබිමක් තියෙන ඉන්දියාවේ පළාත් වල ඉඳිආප්ප, ආප්ප විතරක් නෙමෙයි, කොත්තු පවා ආසන්නව ඒ විදිහට තියෙනවා. ඉන්දුනීසියාව වගේ යටත් විජිත රටවලත් කෑම වලට ඒ රටවල බලපෑම ඇවිත් තියෙනවා. ඒ වගේම අපේ රටවලින් අරං ගිය කුළුබඩු නිසා ඒ කාලේ යුරෝපයේ කෑම වලත් වෙනස්කම් ඇති වුණා.
අපේ රටට පිටරටින් ආහාර එන්න වෙන්නේ නැවෙන්. එතකොට නැව් ගාස්තු එකතු වෙනවා. ඒ නිසා අපිට වෙන රටවලින් එන කෑම ජාති වලට ගොඩක් මිලක් ගෙවන්න වෙනවා. අපිට මෙහේ නැති අල වර්ගයකින් හදන අප්‍රිකාවේ කෑම ජාතියක් මෙහෙදි හදාගන්න අමාරුයි මොකද ඒ අල ජාතිය මෙහෙට ගෙන්නාගන්න එක ගැටළුවක්. රට රටවල එක එක කාලෙට නීති රීති එකතු වෙනවා. ලංකාවට සහල් රටින් ගෙන්වන්න නිති රීති, බදු එකතු වෙනවා. ඒ වගේම පාන්පිටි, පරිප්පු වගේ රටින් එන දේවල් වලටත් නැව්ගාස්තු සහ තවත් දේවල් එකතු වෙනවා. ඒ නිසා අපි දේශීය සහල් වැඩිපුර පාවිච්චියට හුරු වෙලා තියෙනවා. ඒ වගේ රටේ ආනයන අපනයන නීතිත් ආහාර වලට බලපානවා.
කෑම උයන විදිහත් රටින් රටට වෙනස්. ඇමරිකාවේ, යුරෝපයේ ජනයා මස් පලහා කන්න වඩාත් මනාපයි. ඔවුන් බාබකිවු සහ කෙළින්ම මස් පුළුස්සන ක්‍රම හරහා ආහාර පිළියෙල කරගන්නවා. ඒත් ලංකාව, ඉන්දියාව වගේ දකුණු ආසියානු රටවල මස් වලට වඩා ධාන්‍ය වර්ග ආහාරයට ගන්නවා. සහල් උයන රටවල වුවත් හාල් වලින් බත් පිසගන්නේ එකම ආකාරයට නෙමෙයි. චීනේ ස්ටිකී රයිස් ආහාරයට ගන්න පිරිස වැඩියි. ජපානයේ ජනයා අමුවෙන් මාළු කන්න ආසයි. ඔවුන්ගේ වට්ටෝරු වල අමු මාළු තියෙනවා. ඒත් ජර්මනිය වගේ රටක් ගත්තොත් ඔවුන් මාළු උයලා තමයි ආහාරයට ගන්නේ. මේ විදිහට කෑම හදන ආකාරයත් රටින් රටට, පළාතෙන් පළාතට වෙනස් වෙනවා.
Saru FM Media
