රට පත්ව ඇති බරපතළ ආර්ථික අර්බුදය ජය ගැනීම සඳහා පටු දේශපාලන දෘෂ්ටි වාදය පසෙකලා සැවොම එක්සත් විය යුතු යැයි එක්සත් ජාතික පක්ෂයේ කොළඹ දිස්ත්‍රික් නායක සහ හිටපු මුදල් අමාත්‍ය රවී කරුණානායක මහතා අවධාරණය කර සිටියි.
ඒ මහතා මෙම අදහස් පළ කළේ තොට ළඟ පිහිටි දේශපාලන කාර්යාලයේ පැවැති උත්සවයකින් අනතුරුව මාධ්‍ය වෙත අදහස් පළ කරමින්.
කොළඹ දිස්ත්‍රික්කයේ ත්‍රී රෝද රථ රියදුරන් මුණ පා ඇති ගැටලු සම්බන්ධයෙන් සහ ඔවුන්ගේ ඉදිරි සුභසාධන කටයුතු නගා සිටුවීම සඳහා සියලු ත්‍රීරෝද රථ සංගම් නියෝජනය කරමින් “එක්සත් මගී ප්‍රවාහන සේවා වෘත්තිකයන්ගේ සංගමය” නමින් නව සංගමයක් මෙහිදී ආරම්භ කරනු ලැබුවා.
මෙහිදී මූලික අදියර යටතේ නිලධාරීන් මණ්ඩලය පත් කරගත් අතර ඉදිරියේදී පුළුල්ව මෙම සංවිධානය රට පුරා දීප ව්‍යාප්ත කිරීමටද යෝජනා කෙරුණා. එක්සත් ජාතික පක්ෂය මූලික කරගත් ප්‍රථම ත්‍රිවිල් රථ සංගමය මෙය ලෙසයි හැඳින්වෙන්නේ.
මෙහිදී හිටපු මුදල් අමාත්‍ය රවී කරුණානායක මහතා රටේ පවතින වත්මන් දේශපාලන තත්ත්වය සහ ඉදිරි දේශපාලන ක්‍රියාකාරකම් පිළිබඳව මෙලෙස අදහස් පළ කළා.
මේ සියලු අභියෝග ජය ගැනීම සඳහා මුළු රටම එක මිටට එකාසේ එකට ඒකරාශී විය යුතු අතර රනිල් වික්‍රමසිංහ මහතාට ඊට නායකත්වය දිය හැකි යැයි ද, ඔහු හැර කිසිම විකල්පයක් රටට-ජනතාවට ඉතිරිව නැතැයි ද රවී කරුණානායක මහතා පෙන්වා දෙනවා.
මේ සම්බන්ධයෙන් තව දුරටත් අදහස් දක්වන කොළඹ දිස්ත්‍රික් නායක සහ හිටපු මුදල් අමාත්‍ය රවී කරුණානායක මහතා මෙසේ ද අවධාරණය කර සිටියි.
“ජනාධිපති රනිල් වික්‍රමසිංහ මහතා මේ වන විට රාජ්‍ය ආදායම් ඉහළ නංවා ගනිමින්, ඒ වෙනුවෙන් ප්‍රමුඛ අවධානයක් ලබා දෙමින් සහ අත්‍යවශ්‍ය ප්‍රතිසංස්කරණ සිදු කරමින් කඩා වැටුණු ආර්ථිකය යළි ගොඩගනිමින් සිටිනවා.
“System Change” ගැන කතා කරන උදවිය, ජනාධිපතිවරයාගේ මෙම සාධනීය දේශපාලන-ආර්ථික සහ සමාජ වැඩ පිළිවෙළ හමුවේ භීතියට පත්ව මේ ගමන යළි හැරවීම සඳහා විවිධ පටු දේශපාලන සටන් පාඨ කියමින් දේශද්‍රෝහී සහ ජාතිද්‍රෝහී ලාභ උත්සාහයක යෙදී සිටිනවා.
ආර්ථික, දේශපාලන සහ සමාජ ප්‍රතිසංස්කරණ සිදු නොකර “System Change” කරන්නේ කෙසේ ද කියා එක්සත් ජාතික පක්ෂය ලෙස අප මේ අවස්ථාවාදීන්ගෙන් සහ බල ලෝභී අන්තවාදීන්ගෙන් ප්‍රශ්න කර සිටිනවා. ප්‍රතිසංසකරණවලින් තොරව “System Change” සිදු නොවන බව කුඩා දරුවෙකු පවා දන්නවා.
Saru FM Media
