රජකාලේ කියන්නේ වැඩිය ප්රශ්නයක් නැතුව මිනිස්සු ජීවත් වුන කාලයක්. ඒ කාලේ මේ වගේ සංකීර්ණ දේශපාලන සමාජ ප්රශ්න තිබුණේ නැහැ. ජනතාව ජීවත් විය යුතු ආකාර ගැන හැමදේම වගේ තීරණය වුනේ රජතුමාගේ රාජ නියෝග අනුව. කුල සම්ප්රදායයන් අනුව සමහර කුල වල අයට උඩුකයට ඇඳුමක් අඳින්නවත් ඒ කාලේ අවසර තිබුණේ නැහැ. ඉතින් ඒ කාලේත් මේ අද වගේ රජවරුන්ට බලේ ඉඳලා ආයෙත් බලේට පත්වෙන්න ඡන්ද තිබ්බනම් මොන වගේ වෙයිද? විපක්ෂ අය මොනවා කියයිද? ඒ ගැනයි මේ කියන්නේ.
බුද්ධදාස… බුද්ධදාස. කෝ මේ බුද්ධදාස? බුද්ධදාස කියන්නේ කවුද? සත්තුන්ට වෙදකම් කරන කුමාරයෙක්. මේ බුද්ධදාසගෙ වැඩ දැන් ගොඩක් ජනප්රියයි නේ… දැන් ඔයාලට ඇහෙනවා ඇති බුද්ධදාස කරන වෙදකම් ගැන. මේ රට ඇත්තටම තියෙන්නේ වෙදකම ගැන ගැටලුවකද? ආන්න එහෙනම් මේ බුද්ධදාස වගේ වෙද්දු රටට හරියයිද? ඊට වඩා ගැඹුරු අර්බුද ගොඩක් එක්ක අද අපේ රට තියෙන්නේ. ඒ නිසා තැන් තැන් වල ගිහින් හුඹස් වල ඉන්න නයින්ට වෙදකම් කරපු පලියට බුද්ධදාසලා ආයෙත් රජ තනතුරු වල තියන්න එපා කියලා මම ඉල්ලන්න කැමතියි…
විසාල මාලිගාවක්. තට්ටු හතක්. මේ කාගේ සල්ලිද? දුප්පත් මහජනතාව අර බදු මේ බදු වශයෙන් ගෙවපු සල්ලි. ගඩොල්ම කීයක්ද? මොකද්ද මේ මාලිගා වලින් මහජනතාවට තියෙන අඩුපාඩුව? මම ආවොත් මිත්රවරුනි මේ මාලිගා කාර්මික විද්යාල කරලා දරුවන්ට ඉගෙනගන්න තැනක් ඇති කරනවා. මට ඉන්න පොඩි පැළක් ඔය වැවක් ගාවින් අටවගන්නවා. ආන්න ඒ පැළේ ඉඳන් මම මේ රජකම කරගෙන ඔබ තමුන්නාන්සේලට සේවය කරනවා. පරාක්රමබාහු මොනවද කළේ? වැව් ටිකක් එකතු කළා, ගැහුවා පරාක්රම සමුද්රය කියලා. මේ තුමා එහෙම එකතු කරලා නම ගහන් නැහැ… අලුතින්ම හදාල ජනතාවට ඒ අලුත් වැව් වලින් අලුත් කුඹුරු ලබාදෙන්න කටයුතු කරනවා කියලා කියන්න කැමතියි.
නංගිල මල්ලිලා දන්නවා ඇති අද එදා දුටුගැමුණු රජතුමා විජිතපුර ගියපු කාලේ විසඳුම් හරියන් නැහැ. මේ නංගිලාට ඕනි ලස්සන මාල වළලු. මල්ලිලාට ඕනි අලුතින් මිරිවැඩිසඟල. ලොකු වැව් දාගැබ් හැදුවා කියලා මේවා ලබාගන්න මල්ලිලාට නංගිලට බැහැ. අපි අපේ ඊලඟ රජ කාලය තුල රටේ ජනතාවගේ අත මිට සරු කරනවා. මේ රටෙන් විතරක් නෙමෙයි, පිට රටිනුත් මාල වළලු ගන්න අවස්ථාව අපි මේ නංගිල මල්ලිලාට උදා කරලා දෙනවා. ඒ වගේම යුද්දෙ දින්නේ දුටුගැමුණු විතරක් තනියමද? නෑ කඩොල් ඇතයි, යෝදයෝ දහ දෙනයි, මහ සේනාවයි කරපු යුද්දේ අද තනියම කළා වගේ දුටුගැමුණුගේ ගෝලයෝ කියනවා.
එයා කිරි මූද හැදුවලු, දළදා මාලිගාවෙ පත්තිරිප්පුව හැදුවාලු, සිංහල ජනතාවට ගොඩක් වැඩ කළාලු? ඒත් කවුද මේ රාජසිංහ? එයා තමයි වඩුග රාජසිංහ. මහජනතාව දන්නවා රාජසිංහ කියන්නේ කවුද කියලා. සිංහල නායකයො එක්ක එකතු වෙලා, දෙමළ අධිරාජ්යවාදී කුමන්ත්රණ පිල්ලි එක්ක එකතු වෙලා මේ රටේ බලය අල්ලගත්තා. ඉන් පස්සෙ ජනතාවට හොඳ මූණ පෙන්වන්න පොඩි පොඩි වැඩ ටිකක් කළා. ඒ වුනාට මේ රාජසිංහ කොහෙද ඉන්න ඕනි? මොකද්ද එයාට ලැබෙන්න ඕනි කියලා ජනතාව තීරණය කරලා ඉවරයි. වඩුග රජා ඉන්දියාවට, අපේම අපේ රජෙක් ලංකාවට… ජයවේවා…
Saru FM Media