ඉස්සර කාලෙ නම් කතාවටත් කිව්වෙ කාන්තාවකට රත්තරන් පොරවගෙන පේදුරුතුඩුවෙ ඉඳල දෙවුන්දරතුඩුවට යනකම්ම ඇවිදගෙන යන්න පුළුවන් කියලයි. ඒ කියන්නෙ කාන්තාවටවත් රත්තරන් වලටවත් ඒ කාලෙ මේ සිරි ලංකාව ඇතුලෙ කිසිම සොර සතුරු බියක් නැහැ කියන එකයි. හැබැයි ඒ කාලෙ වගේද දැන් කාලෙ? රත්තරන් පොරවගෙන තියා සකලවිධ ආරක්ෂණ උපකරණ පැළඳගෙනවත් අඩුම තරමේ කිලෝ මීටර දෙක තුනක ගමනක්වත් ගැහැණු ළමයෙකුට යන්න බැරි කාලයක්. අහන අහන තැන කාන්තා දූෂණ, මිනීමැරුම්. හැබැයි එහෙමයි කියල අද කාලෙ ගැහැණු දරුවන්ට ගෙවල් දොරවල් ඇතුලටම වෙලා ඉන්නත් බැහැනේ. රැකියාවල් කරද්දි, යාළු මිත්‍රයො ආශ්‍රය කරද්දි රෑ පානෙ ගමන් බිමන් එහෙමත් යෙදෙන්න පුළුවන්. නොයා ඉන්න එකනම් නෙමේ විසඳුම. තමන්ගෙ ආරක්ෂාව තමන්ම සලසගන්න යම් තරමකට හරි දැනගෙන ඉන්න ඕන. ඉතින් මේ කියන්න යන්නෙ එහෙම රෑ පානෙ ගමන් ගිහින් හදිසියේ හරි කුලී රථයක ගෙදර එන්න වෙන අවස්ථාවක තමන්ගෙ ආරක්ෂාව වෙනුවෙන් ගන්න පුළුවන් පියවර කීපයක් ගැනයි.
ටැක්සි සර්විස් එකක් තෝරගන්නකොට ඒ ටැක්සි සර්විස් එකේ කීර්තිනාමය, විශ්වාසනීයබව වගේ කාරණා ඉහලින්ම සලකල බලන්න ඕන. ගාණ අඩු නිසා පොඩි පොඩි ටැක්සි සර්විස් තෝරා නොගෙන හොඳ නමක් තියෙන විශ්වාසවන්ත සර්විස් එකක් තෝරගන්න. මොකද එයාලගෙ රියදුරන් සම්බන්ධ සියළුම විස්තර ආයතනය සතුව තියෙනව වගේම, ගමනේ මුළු වගකීමම ආයතනය බාරගන්නව.
දැන් තියෙන ඌබර්, පික් මී වගේ ඔන්ලයින් කැබ් සර්විසස් මේකට හොඳම විසඳුමක්. මොකද ඒ රියදුරන්ගේ සියළු විස්තර ඇප් එකේම පෙන්නන නිසා ලොකු ලොකු සෙල්ලම් දාන්න බෑ ඩ්‍රයිවර්ස්ලට.
රෑ වෙලා ගමනක් යන හැම වෙලාවකම තමන් අදාළ ස්ථානයෙන් පිට වෙච්ච වෙලාව, කැබ් එක ගත්ත වෙලාව වගේ දේවල් තමන්ගෙ ගෙදර හෝ බෝඩිමක වගේ තැනකනම් තමන් එක්ක එකට ඉන්න කෙනෙක්ට දන්වන එකත් හරිම වැදගත්. මොකද කැබ් එකට නැග්ග වෙලාව අනුව ගෙදරට එන්න ටිකක් හරි පරක්කු උණොත් හොයල බලන්න හරි ගෙදර කෙනෙක් දැනුවත්නේ.
ඒ වගේම අතිරේක තොරතුරු විදිහට රියදුරුගේ නම වගේ තොරතුරුත් දෙන්න පුළුවන්නම් වඩා හොඳයි. විශේෂයෙන්ම මේ තොරතුරු රියදුරුට ඇහෙන්නම ගෙදර කෙනෙකුට කෝල් කරල කියන්න පුළුවන්නම් ඒ තොරතුරු ගැන තවත් කෙනෙක් දැනුවත් කියල පුංචි බයකුත් රියදුරාට ඇති කරන්නත් පුළුවන්. ඌබර්, පික් මී ඇප් වලනම් මේ තොරතුරු බලාගන්න විතරක් නෙමෙයි, තව කෙනෙක් එක්ක ශෙයාර් කරන්න පුළුවන් පහසුකමත් දීල තියෙන නිසා බයවෙන්න දෙයක් නැහැ.
Saru FM Media
