පොදු වැසිකිළි හිතලාම යන අය නම් හරිම අඩුවෙන් ඉන්නේ. එත් ශරීර කෘත්‍යය කරන්න, මුත්‍රා බරක් නිදහස් කරගන්න අපි හැමෝටම හදිසියේ මේ පොදු වැසිකිළි උවමනා වෙනවා. බස් නැවතුම්පොළක අයිනේ තියෙන වැසිකිළිය වගේම ආයතනයක තිබෙන පණහක් හැටක් පාවිච්චි කරන වැසිකිළියත් අර්ථයෙන් ගත්තාම පොදු වැසිකිළි කොටසකට තමයි අයිති වෙන්නේ. ඉතින් මේ පොදු වැසිකිළි ගැන අපි තොරතුරු ටිකක් දැනගනිමු.
මේ දවස්වල නම් අපි හැමෝම ළඟ කුඩා සැනිටයිසර් එකක් තියෙනවා. ටොයිලට් එකේ කොමඩ්වල වල කොටසේ වගේම අපි හැමෝම වාඩිවෙන කොටසේත් අහිතකර බැක්ටීරියා පිරිලා තියෙනවා. මේ වගේ වෙලාවට ඒ ටොයිලට් සීට් එක සැනිටයිසර් වලින් පිරිසිදු කරගන්න පුළුවන්. එහෙම නැතිනම් ටොයිලට් සීට් එකට ටොයිලට් පේපර් හෝ එවැනි කඩදාසියක් එලා ගන්නත් පුළුවන්. හැම වෙලාවේම ප්‍රායෝගික නැතත් පුළුවන් අවස්ථාවට ටොයිලට් එකේ කොමඩ් එකේ වාඩිවෙන කොටස හැකි තරම් පිරිසිදු කරලා වාඩිවෙන එක කෝකටත් හොඳයි.
අපි දන්නවා ෆ්ලශ් කරන එක අපි විතරක් කරන දෙයක් නෙමෙයි. ෆ්ලශ් කරන්න තියෙන බොත්තම හෝ ලීවරය අල්ලන්නත් කඩදාසි කැබැල්ලක් පාවිච්චි කරන එක හොඳ පුරුද්දක්. ඒ වගේම ටොයිලට් එකේ වාඩිවෙලා ඉද්දි ෆ්ලශ් කරන එක හොඳ නැහැ. මොකද ඒ හරහා අහිතිකර බැක්ටීරියා කැලතීමෙන් ඒවා නැවතත් අපේ සමේ, යෝනි සහ අධෝ විවර වල තැවරෙන්නට ඉඩ තියෙනවා. ඒ නිසා ෆ්ලශ් කරනකොට හැකිතාක් ඈතින් සිට ෆ්ලශ් කරන්නට ඕනි. ඒ වගේම “අහා හරි සුවඳ ඇති නේද?” කියලා ඒ වෙලාවේ හුස්ම අදින්නත් හොඳ නැහැ. කොහොමත් ගඳ එක වෙනම කතාවක්. ඒත් එවෙලෙට එන බැක්ටීරියා කෙලින්ම අපේ ශ්වාසනාල සහ මුඛයට ඇතුළු වෙන්න ඒ හරහා ඉඩ ලැබෙනවා.
වැසිකිළි ගිය පසු හැමෝම අත් හේදුවත් පිරිමි අතරින් සියයට 30ක් තමයි නියම ක්‍රමයට විෂබීජ ඉවත් වෙන විදිහට අත් හෝදන්නේ. කාන්තාවන් නම් 60%ක් පමණ වැසිකිළි ගිය පසු හොඳින් දෑත් සෝදාගන්නවා. වැසිකිළියේදි අපේ අත්වලට අහිතකර බැක්ටීරියා තැවරෙන්න තියෙන ඉඩකඩ බොහොම වැඩියි. ඒ නිසා අත් දෙක සෝදාගැනීමේදී අත්වල ඇඟිලිවල සෑම තැනක්ම හොඳින් සබන් තැවරෙන සේ සෝදාගන්නට ඕනි. ඒ වගේම අපි හෝදන ටැප් එකේ කරාම කොටසත් සබන් ටිකක් දාල පිරිසිදු කර ගන්න පුළුවන් නම් හොඳයි. මොකද ඒ කොටස අපි හැමෝම අල්ලන නිසා ඇතැම් විට එය මිලිමීටරයකට සිය ගාණක් බැක්ටීරියා ඉන්න තැනක් වෙන්නට පුළුවන්.
Saru FM Media
