ලංකාවේ ඉන්න අපිට කඳු නැගීමත් මුහුදේ පිහිනීමත් කියන ක්‍රීඩා කටයුතු දෙකම කරන්නට අවස්ථාව ලැබිලා තියෙනවා. ඒක වාසනාවක්. කඳු කිව්වාට අපිට ඉතින් නගින්නට ලැබෙන්නේ මීටර 2500ට වඩා අඩු කඳු. ඉතින් මේ කඳු නැගීම් අතර අපිට නගින්න පුළුවන් උසම කන්ද වෙන කිරිගල්පොත්ත තරණය ගැන අපි විස්තර ටිකක් දැනගමු.
ඔව් පිදුරුතලාගල තමයි උසම කන්ද. මේ කාලේ නම් කෙලින්ම වාහනයකින් පිදුරුතලාගල මුදුනට යන්නට පුළුවන්. ඒ වගේම පිදුරුතලාගල මන්දාරම් නුවර පැත්තෙන් නගින්නත් පුළුවන්. ඒත් පිදුරුතලාගල නගින්න අවසර ගන්නට ඕනි. අනෙක් පැත්තෙන් ගත්තොත් කෙලින්ම වාහනයකින් උඩට යන්න පුළුවන්කම තියෙන පිදුරුතලාගල නැගීම එතරම් ගැම්මක් තියන වැඩක් නෙමෙයි. ඒ එක්ක තරණය කරන්න, එහෙම නැතිනම් පයින් ගිහින් හයික් එකක් ට්‍රෙකින් එකක් දාන්න තියෙන කඳු අතර මූලික තැන ඉබේම ලංකාවේ උසම කඳු අතර දෙවැනි තැන තියෙන කිරිගල්පොත්ත කන්දට ලැබෙනවා.
මේ කිරිගල්පොත්ත එක්තරා කාලයකදී කළුපහන බඹරකන්ද අන්තයෙන් එනම් ලෝකාන්තය හෝටන් තැන්නේ පහළ බෑවුම් වලින් පටන් අරගෙන නගින්න පාරවල් තිබිලා තියෙනවා. දැනටත් කොළඹ ඉඳන් කෙලින්ම කිරිගල්පොත්තට මැප් කළාම ඒ පරණ පාරවල් පෙන්නුම් කරනවා. ඒත් දැනට ඒ පහළ ඉඳන් එන පාරවල් වැහිලා. දැන් බෙලිහුල්ඔය ඉඳන් ලෝකාන්තයට නග්‍රාක් බංගලාව පැත්තෙන් එන පාරත් වහලා තියෙන්නේ. ඒ පැත්තෙන් හෝටන් තැන්නට පිවිසීම තහනම්. ඉතින් ඒ නිසා කිරිගල්පොත්තට දැනට තියෙන හොඳම පාර විදිහට හෝටන් තැන්න පිවිසුම අසල පාර තෝරාගන්නට වෙනවා. ඒ පාර සැබැවින්ම ලස්සනයි.
මේ කිරිගල්පොත්ත උඩ ගිහින් කෑම්ප් කරන්න බැහැ. ගමන පටන් ගන්න ලෝකාන්ත හෝටන් තැන්න පිවිසුමේ ඉඳලා ගමනට එක පැත්තකට කිලෝමීටර 7ක් තියෙනවා. මේ මාර්ගය පටන් ගන්නෙත් එක්තරා උසකින්. ඒ නිසා දිගින් දිගටම නැග්මක් නැහැ. ගමනේ අවසාන හරියේදි නම් ටිකක් සැර නැග්මක් හමු වෙනවා. වෙනත් කඳු වලට වඩා මේකේ තියෙන විශේෂත්වයක් තමයි මගදි හමුවන විල්ලු සහ වගුරු බිම්. වැසි කාලයක නම් මේ යන මාර්ගය තැනින් තැන මඩ වෙනවා. එතකොට පරෙස්සමෙන් මඩේ එරෙන්නේ නැතිව යන්න ලොකු ගේමක් දෙන්න වෙනවා.
මේ ගමන අවසානයේ කන්ද උඩ කෑම්ප් ගහන්න බැහැ. අනිවාර්යයෙන්ම හැරිලා එන්නම ඕනි දවසක් ඇතුළත. ඒ වගේම හෝටන් තැන්න සහ කිරිගල්පොත්ත දෙකටම තියෙන නීතියක් තමයි හවස දෙකෙන් පස්සේ ඇතුළු වෙන්න දෙන්නේ නැහැ. දෙකෙන් පස්සේ යන එකත් අවදානමක්. වැඩිය කඳු පුරුදු නැති එක් අයෙකු හෝ ඉන්නවා නම් උදෑසනම ඒ කියන්නේ හෝටන් තැන්න මාර්ගය විවෘත වෙන උදේ 6.30ට වගේ පාන්දරම වැඩේ පටන් ගන්න ඕනි. ඒ වගේම හවස 1-2 වෙද්දිවත් කන්ද නැගලා තියෙන්න ඕනි. එහෙම නැතිනම් ආපහු හැරිලා එන එක තමයි යුතු. මොකද මේ ගමන් මාර්ගය කළුවරේ තියා දවල්ට සොයාගන්නත් ටිකක් අමාරුයි.
Saru FM Media
