දැන් වෙනකොට කොරෝනා තත්ත්වෙත් පොඩ්ඩක් සමනයක් වෙලා තියෙන නිසා, ගොඩක් අය ට්‍රිප්ස් එහෙම යනවා. තවත් ගොඩක් අය ට්‍රිප් යන්න හිතාගෙන ඉන්නවා, ගිය අවුරුද්දේ ඇරියසුත් එක්කම කවර් කරන්න. හරි, ට්‍රිප් යන එක අලුත් දෙයක් නෙවෙයි. ට්‍රිප් එකක් යනකොට ගෙනියන්න ඕන මොනවද කියන එක ගැනත් හැමෝටම වගේ සාමාන්‍ය අදහසක් තියෙනවා. හැබැයි දැන් කාලේ අපි ට්‍රිප් එකක් යනකොට පැක් කරගන්න දේවල් අතරට ඔය සමහර ගැජට් බැජට් එහෙමත් අයිති වෙනවා. ඒ ඇයි කියලා දිගටම කියවගෙන යනකොට තේරෙයි.
එහෙමනම් බලමු ට්‍රිප් එකක් යනකොට ගෙනියන්න වැදගත් වෙන ගැජට් බැජට් ටිකක් මොනවද කියලා!
මෙන්න මෙව්වා ඉතින් අනිවාර්ය දේවල්. දැන් අපි සංචාරයක යෙදෙන කොට ෆෝන් චාර්ජර්, කැමරා බැටරි චාර්ජර් අරව මේවා අරගෙන යනවා. හැබැයි සමහර වෙලාවට, අපි නවතින තැනක අපේ චාර්ජර් වලට හරි වෙනත් මොකක් හරි කරන්ට් එකට ගහන ගැජට් එකක් හරි ගහන්න හරියන පවර් සොකට් නෑ. දැං මොකේදැයි දං වළඳන්නේ? ආන්න එතකොට තමයි මේ ට්‍රැවල් ඇඩැප්ටරයක් වටින්නේ. මේවට ඔය ව්‍යවහාර බාසාවෙන් ගොඩක් අය කියන්නේ ‘කැටයක්’ කියලා. හැබැයි හොඳ ට්‍රැවල් ඇඩැප්ටරේක එක එක විදියේ සොකට් ගණනාවකට හරියන ප්ලග් කූරු වගේම, සොකට් කීපෙකුත් තියෙනවා. නවීන ඒවල USB පෝට් එකක් දෙකක් එහෙමත් තියෙනවා.
ට්‍රිප් එකක් යනකොට කොච්චර සොබා අසිරිය බල බලා ගියත්, සිංදුවක් කාරිය කියාගෙන ගියත්, පොඩ්ඩක් තමන්ට නිස්කලංකේ ඉන්න වුවමනා මොහොතක් එනවා. අන්න ඒ වෙලාවට සිංදුවක් අහන්න තියේ නං සුපිරි. සිංදු නං ඉතින් ස්මාට්ෆෝන් එකෙන් හරි වෙන ස්මාට් ගැජට් එකකින් හරි අහන්න පුළුවන්. හැබැයි ඒක පුද්ගලිකව සහ නිස්කලංකේ රසවිඳින්න නම් හෙඩ්ෆෝන් දෙකක් තියෙන්න ඕන. නිකම්ම හෙඩ්ෆෝන් හරියන්නෙත් නෑ. මගතොටේ සද්ද බද්ද කපාහැරලා සංගීතේ විඳින්න නං නොයිස් කැන්සලින් හෙඩ්ෆෝන් දෙකක් ඕන.
සාමාන්‍යයෙන් ට්‍රැවල් කරන හාදයෙක්ට හාදියකට ඒ තරම් ඇඳුම් අයන් කරලා මදින්න අවශ්‍යතාවයක් එන්නෙ නෑ. හැබැයි ඉතින් සමහරු කැමතියි පිළිවෙලට ඇඳුම් අයන් කරලම මදින්න. ඉතින් එහෙම කෙනෙක්ට ඔය නවාතැන් ගන්න තැනක අයන් එකක් හොයාගන්න නැති වෙන්න පුළුවන්. ආන්න එහෙම අවස්ථාවකට ගැලපෙන්නේ ට්‍රැවල් ස්ටීම් අයන් එකකුත් ගෙනියන එක. අර වතුර දාලා ස්ටීම් එකෙන් ඇඳුම් මදින්න පුළුවන් මේ ජාතියේ අයන් එකක් ඉතාම හුරුබුහුටියි. ප්‍රමාණයෙන් කුඩා නිසා පහසුවෙන් අරගෙන යන්නත් හැකියි.
ඇක්ෂන් කැමරාවක් මොකටද? ඇයි ස්මාට්ෆෝන් එකෙන් වීඩියෝ කරන්න බැරිද? එහෙම අහන කෙනෙක් ඇත්තටම ඇක්ෂන් කැමරාවක් පාවිච්චි කරලා නෑ. දැන් ඔය නැන්දලා මාමලා එක්ක තුන්සරණේ කිය කියා යන වන්දනා චාරිකාවක් නෙවෙයි, නියම ඇඩ්වෙන්චර් වැඩ ඇතුළත් වෙන ටුවර් එකක් නම් යනනේ, ඇක්ෂන් කැමරාවක වටිනකම කියලා නිම කරන්න බෑ. මේ ඇක්ෂන් කැමරා වල තියෙන හයි කොලිටි ෆොටෝ සහ වීඩියෝ හැකියාව වගේම, ඉතාම සුළු චලනයක් වුණත් හොඳින් ග්‍රහණය කරගන්න පුළුවන් වීමත් ඇඩ්වෙන්චර් වැඩ වලට වටිනවා. අනික මේ ඇක්ෂන් කැමරා බයික් එකක හැන්ඩ්ල් එකේ, හෙල්මට් එකේ හයි කරන්න හරි අතේ බැඳගන්න හරි පුළුවන් වීමත් වටිනවා.
Saru FM Media
