“බලු වැඩ කරන්න එපා” කිව්වට ඇත්තටම අපි ඒ කියන ජාතියේ බලු වැඩ බල්ලන් කරනවා අඩුයි. මිනිසුන්ට වඩා උසස් ගතිගුණ තියෙන බල්ලන් ගැන කතාන්දර අනන්තයි, අප්‍රමාණයි. ඉතින් මේ බල්ලන්ගෙ මිනිස්සු දකින වැරදි සහ හොඳ ගතිලක්ෂණ තියෙනවා. ඉතින් අපි එක්ක වසර ලක්ෂ ගාණක් තිස්සේ එකට ඉන්න මේ බල්ලන්ගේ පැත්තෙන් මිනිස්සුන්ව දකින්නේ කොහොමද කියලාත් අපි බලමු.
බල්ලන් කියන්නේ මිනිසා එක්ක ජීවත් වෙන්න හුරු වෙච්චි ජාතියක්. වැඩක් කරනකොට, සෙල්ලම් කරන කොට වගේම විවේකයෙන් ඉන්නකොටත් අපි ලඟින්ම ඉන්න බල්ලන් කැමතියි. ඒක බල්ලන්ට මහත් ආඩම්බරයක් ලැබෙන වැඩක්. උන්ව මොන විදිහට ලඟින් තියන් හිටියත් අපිට උන්ව දාලා අපේ වැඩට යන්න වෙනවා. ඒක අලුත් බල්ලෙක්ට ටිකක් අප්සෙට් හිතෙන වැඩක්. කලක් යද්දි මේ තත්ත්වය හරියනවා. ඒත් මුලදි උන්ට ඒ වෙන්ව යෑමත් එක්ක නැවත අපි ඒවිද කියන සැකය ඇති වෙනවා. ඒ වගේම හැර යනවිට බොහොම දුකින් උන් හැසිරෙනවා.
මිනිස්සු විදිහට අපි ජීවත් වෙන්නේ ශ්‍රව්‍ය දෘෂ්‍ය ලෝකයක. අපිට ශ්‍රව්‍ය දෘෂ්‍ය මාධ්‍යයන් හරහා විනෝද වෙන්න හැකියාව තියෙනවා. අපි එක්කෝ පොත් බලනවා, නැත්නම් ෆෝන් බලනවා, ලැප්ටොප් වල වැඩ කරනවා. ඒත් බල්ලන් කැමති ඇවිදින්න, ඉව කරන්න, හාරන්න, අලුත් තැන් බලන්න වගේ ඇඩ්වෙන්චරස් වැඩ වලට. ඉතින් උන්ගේ ලෝකයේදී අපි මේ රූප පෙට්ටියක් ඉස්සරහට වෙලා ටීවී එකට මූණ දාගෙන ඉන්න එක ප්‍රශ්නාර්ථයක්.
බල්ලෝ කියන්නේ එකම විදිහට ඉන්න සත්තු නේ. මේ මනුස්ස අපි වගේ දවසකට කිහිප වතාවක් ඇඳුම් මාරු කරන, ගමනක් යද්දි සුවඳ සෙන්ට් ගහන, සපත්තු සෙරප්පු ජෝඩු කිහිපයක් පාවිච්චි කරන එක බල්ලන්ට සෙට් වෙන්නෙ නැහැ. බල්ලන් දේවල් හඳුනාගන්නේ හැඩයෙන් සහ සුවඳින්. මේ දෙකම මිනිස්සු ඇඳුම් වලින් සහ විලවුන්, සබන් ආදියෙන් වෙනස් කරගන්නවා. ඒ වගේම අපි ඉන්න ගෙවල් තුළ පවා ඒ තැන් හැඩට තියාගන්න සුවඳකාරක ගහනවා. හැඩ තල වෙනස් කරනවා. අඩුවෙන් වෙනස් වෙන ලෝකයකට වසර මිලියන ගාණක් තිස්සේ හුරුවෙලා හිටිය බල්ලන්ට මේ වෙනස් වීම් ටිකක් අවුල් ඇති කරනවා ඇති.
Saru FM Media
