ලංකාවේ සිනමා ඉතිහාසය පිළිබඳව කෙටි ලිපි මාලාවක් පළකරන්න මීට මාස දෙකකට පමණ පෙර අපි ආරම්භ කළා. නමුත් කාර්යබහුලත්වයත් එක්ක එම ලිපි මාලාව පසුගිය මාසවල පළවීම ටිකක් විතර මඟ ඇරුණා. ඒ පිළිබඳව කණගාටුව පළ කරන ගමන් අපි අදත් ලංකා සිනමා ඉතිහාසයේ සොඳුරු ඉතිහාසය සොයා යමු.
ලංකාවේ කතානාද සිනමා ඉතිහාසයේ පළමු චිත්‍රපටය බවට පත්වීමට ‘කඩවුණු පොරොන්දුව’ සහ ‘අශෝකමාලා’ අතර තිබුණේ තරඟයක්. නමුත් කඩවුණු පොරොන්දුව එම තරඟය ජයග්‍රහණය කරනු ලැබුවා.මේ චිත්‍රපටයේ ඇති අනෙක් විශේෂත්වය වන්නේ ඓතිහාසික කතා පුවතක් රැගත් පළමු චිත්‍රපටය එය වීමයි. එසේම කතානායිකාවගේ නමින් චිත්‍රපටය හැඳින්වීමේ රැල්ල ආරම්භ කරන ලද්දේද අශෝකමාලා චිත්‍රපටය විසින්. විශේෂයෙන් සඳහන් කළ යුතු දේ වන්නේ අශෝකමාලා චිත්‍රපටයේ එක ගීතයක් හැර අනෙක් ගීත සියල්ලම ස්වාධීන තනුවලින් යුක්ත වීමයි.
ඉන්දියාවේ චිත්‍රාගාරයක නිෂ්පාදන කටයුතු සිද්ධ වුවත් ලංකාවේ ස්වභාවික දර්ශන යම් තරමක් දුරට හෝ ඇතුළත් වුණු පළමු චිත්‍රපටිය ලෙස මෙය හැඳින්විය හැකියි. එසේම මෙම චිත්‍රපටය ප්‍රදර්ශනය කිරීමේදී අතිරේක වශයෙන් ‘ගාන්ධි ජී’ නම් වූ වාර්තා චිත්‍රපටයක් ප්‍රදර්ශනය කොට තිබෙනවා. විරිඳු ගායනයක් ඇතුළත්වීම, සිහින දර්ශන තිබීම පමණක් නොව ඛේදාන්තයකින් අවසන් වීම ලංකාවේ සිනමාවට එක් වූයේද කපටි ආරක්ෂකයා තුළිනුයි.
චිත්‍රපටිවල ප්‍රදර්ශනය කෙරුණු උද්වේගජනක දර්ශන නිසා හෘදයාබාධවලින් මියගිය රසිකයන් පිළිබඳව අපේ රට තුළ අඩුවෙනුත්, අසල්වැසි ඉන්දියාවේ බහුල වශයෙනුත් වාර්තා වෙනවා. ‘පෙරළෙන ඉරණම’ නම් චිත්‍රපටය නැරඹීමට පැමිණි එච්. එම්. ජය අප්පු නම් සිනමා රසිකයා සිනමාහලට පිවිසෙන පෝලිමේ හිර වී මියයෑම ලාංකේය සිනමා ඉතිහාසය සිදුවූ කණගාටුදායකම මරණයක් ලෙස හඳුන්වන්න පුළුවන්.
මේ චිත්‍රපටය සඳහා ලංකා සිනමා ඉතිහාසයේ හිමිවන තැන පිළිබඳව පාර්ශව දෙකක් පරස්පර විරෝධී මත පළ කරනවා. නමුත් ඔවුන් දෙපාර්ශ්වයම මෙම චිත්‍රපටයේ සුවිශේෂීතාවය මතු කරනු ලබනවා. ඇතැම් අයට අනුව “සැඟවුණු පිළිතුර” චිත්‍රපටිය රූගත කරන දර්ශන තලයෙන් එම චිත්‍රපටය දෙමළ බසින් කුසුමලතා ලෙස රූගත කොට තිබෙනවා. ඒ නිසාම ඔවුන්ට අනුව ලංකා සිනමා ඉතිහාසයේ පළමු දෙමළ චිත්‍රපටය වන්නේ කුසුමලතායි. නමුත් අනෙක් පාර්ශවය පවසන්නේ කුසුමලතා යනු සැඟවුණු පිළිතුර චිත්‍රපටයේ හඬකැවීමක් යන්නයි. ඒ අයුරින් ගතකළ දෙමළ බසට හඬ කැවුණු පළමු සිංහල චිත්‍රපටිය විදිහට කුසුමලතා ඉතිහාසගත වෙනවා.
Saru FM Media
