1982 අවුරුද්දේ මුළු ලෝකයේම ජනමාධ්‍ය වල ලාංකිකයෙක්ගේ නම සිරස්තලවලම සඳහන් වුණා. හැබැයි ඒ ලාංකිකයා තමන්ගේ මවුබිමට ගෙනාවේ ගෞරවයක් ද එහෙම නැත්නම් අපකීර්තියක් ද කියන එක ගැන විවිධ අය විවිධ අදහස් පළ කරනවා. සමහර අයට සේපාල ඒකනායක නම් ලාංකිකයා වීරයෙක් වෙද්දි සමහර අයට ආවේගශීලී මෝඩයෙක්. අපි අද කතා කරන්න යන්නේ ඒ සුවිශේෂී පුද්ගලයා ගැන.
පවුලේ මද්දුමයා විදිහට සේපාල ඉපදිලා තියෙන්නෙ මාතර හක්මන කරතොට කියන ගමේ. කුඩා කාලයේදීම ඔහුගේ මව මිය යනවා. ඉන්පස්සෙ ඔහුගේ පියා දෙවෙනි කසාදයක් කර ගන්නා අතර මේ නිසා සේපාලට බාල සහෝදර සහෝදරියන් කීපදෙනෙක්ම ලැබෙනවා. සාමාන්‍ය පෙළ විභාගය දක්වා පාසල් අධ්‍යාපනය ලැබුවත් සේපාල පොතපතේ අධ්‍යාපනයට වැඩි කැමැත්තක් දක්වපු අයෙක් නම් නෙමෙයි. සේපාලගේ ඉරණම ලියවිලා තිබ්බේ වෙනස්ම විදියකට.
සාමාන්‍ය පෙළ විභාගයෙන් පස්සේ තමන්ගෙ ගම අත ඇරල මාතරට එන සේපාල තමන්ගේ වැඩි කාලයක් ගත කරන්නේ ඉංග්‍රීසි ඉගෙන ගන්න. මේ කාලෙදි අහම්බෙන් වගේ සේපාලට ජර්මනියට යන්න අවස්ථාවක් ලැබෙනවා. ජර්මනියට යන්න අවශ්‍ය වෙන ගුවන් ටිකට් පතට අවශ්‍ය මුදලත් සේපාලට ලබාදෙන්නේ සේපාලගේ යාළුවෙක්. හැබැයි ජර්මනියට යද්දි සේපාලගේ හිතේ තමන් මොකක්ද කරන්නේ යන්නේ කියන එක ගැන අදහසක් තිබ්බෙ නැහැ. අවුරුදු තුනක් විතර ජර්මනියේ ගත කරලා සේපාල ඊළඟට යන්නේ ඉතාලියට.
ඉතාලියේදී සේපාලට අන්නා ඇල්ද්‍රොවන්දි නම් තරුණියක් මුණගැහෙනවා. ඉක්මනින් එකිනෙකා හා සමීප වන ඔවුන් දෙදෙනා විවාහ වෙනවා. ඔවුන්ගේ කැදැල්ලට එකතුවන අමුත්තා ෆ්‍රී .අන්නා සමග විවාහ වීමත් එක්ක සේපාලට ඉතාලියේ පුරවැසිභාවය ලැබෙනවා. නමුත් මේ අදාළ අවසර පත්‍රය වාර්ෂිකව යාවත්කාලීන කළ යුතු වෙනවා. එක්තරා අවස්ථාවක තානාපති කාර්යාලයට ගිහිල්ලා තමන්ගේ අවසර පත්‍රය අලුත් කරන්න උත්සාහ කරද්දී තම කාර්යාලයේ සේපාලගේ පරණ අවසරපත්‍ර නැති බවත්, නැවතත් කොළඹට ගොස් අදාළ අවසර පත්‍රය ලබා ගත යුතුයි කියලා දැනුම් දෙනවා.
මේ නිසා සේපාල, අන්නා සහ ෆ්‍රී එක්ක ලංකාවට එනවා. තමන්ගෙ වැඩ කටයුත්ත කරන්න කොළඹ පිහිටි ඉතාලි තානාපති කාර්යාලයට එන සේපාලට එක්තරා තානාපති නිලධාරියෙක්ගෙන් දිගින් දිගටම මදිපුංචිකම් සිද්ධ වෙනවා. නමුත් මේ සියල්ල ඉවසමින් මුල් අවස්ථාවේ පින්සෙන්ඩු වෙමිනුත් පසුව තර්ජනය කරමිනුත් තම කටයුත්ත කරගැනීමට සේපාල උත්සාහ කරනවා. මේ අතරතුරේදී සේපාලට නොදන්වා අන්නා විසින් ෆ්‍රීව රැගෙන ඉතාලිය බලා යනවා.
Saru FM Media
