Lifie අපි අවස්ථා ගණනාවකදී ලෝකයේ විවිධ රටවල රාජාණ්ඩුවල නැගීම සහ වැටීම පිළිබඳව ලිපි ගෙන ඇවිත් තියෙනවා. මුල් කාලයේදී සියළුම රටවල් රාජාණ්ඩු වුණත් කාලයත් එක්ක ප්‍රජාතන්ත්‍රවාදය ආදී සංකල්පවල වර්ධනයත් එක්ක මේ රාජාණ්ඩු ශීඝ්‍රයෙන් සමූහාණ්ඩු බවට පත් වුණා ඒ වගේම අතීතයේදී ලෝකයේ බහුතරයක් රටවල රාජාණ්ඩු ඇදවැටීමට එම රජවරුන්ගේ කල් ක්‍රියාවලු‍ත් වක්‍රාකාරයෙන් බලපෑම් කරලා තියෙනවා. අපි අද ඔබත් එක්ක තොරතුරු බෙදා ගන්න යන්නේ විවිධ රටවල අවසාන රජවරු පිළිබඳව.
පළමු ලෝක යුද්ධය ආරම්භ වන අවධියේදී යුරෝපයේ ප්‍රධානතම බලවේගයක් වූයේ ඔස්ට්‍රියා හංගේරියානු අධිරාජ්‍යයයි. මධ්‍යම යුරෝපයේ වැඩි කොටසක් ඔවුන් සතුව පැවති අතර දීර්ඝ කාලයක් තිස්සේ ඔවුන් සතුව පැවති රාජ්‍යයන් නිදහස් වීම නිසා යම් තාක් දුරකට ඔවුන් දුර්වලව පැවතුණත් කලාපයේ බලවතෙකු ලෙස යම් ප්‍රබලතාවයක සිටියා. නමුත් පළමුවන ලෝක යුද්ධය අවසානයේදී රට අභ්‍යන්තරයෙන්ම ස්වකීය රාජාණ්ඩුවට විරෝධය පැන නැගුණා එහි ප්‍රතිඵලය වූයේ ඔස්ට්‍රියාවේ එවකට රජ කළ පළමු චාල්ස් රජු හට සිය ධූරය අත්හැර දැමීමට සිදුවීමයි.
බල්ගේරියාවේ රජු බවට සයිමන් කුමරු පත්වන විට ඔහුට වයස අවුරුදු හයක් පමණයි. රජුට එරෙහිව රජ පවුල තුළින්ම කුමන්ත්‍රණයක් ඇති වුණු අතර අවසානයේදී ජනමත විචාරණයක් මගින් රජු බලයෙන් පහ කෙරුණා. ඉන්පසුව ඔහු වැඩි කාලයක් ගත කළේ ස්පාඤ්ඤ වැනි රටවලයි. කෙසේ නමුත් බල්ගේරියාවේ පැවැති කොමියුනිස්ට් පාලනය බිඳ වැටීමෙන් පසුව නැවතත් තම මව් රටට පැමිණි සයිමන් කුමරු වසර කීපයක් එරට අගමැතිවරයා ලෙස ද කටයුතු කළා.
පළමුවැනි ලෝක යුද්ධයේ ප්‍රධානතම විත්තිකාරයා ලෙස සැලකෙන දෙවැනි විලියම් කයිසර් හටද පළමු ලෝක යුද්ධයේ පරාජයත් සමග සිය සිහසුන අහිමි වුණා. මුල් අවස්ථාවේදී ඔහු ජර්මානු අධිරාජ්‍ය පදවියෙන් පමණක් ඉවත් වී සිය මව්බිම වන ප්‍රෂියාවේ රජු ලෙස දිගටම කටයුතු කිරීමට උත්සාහ කළත් එය සාර්ථක වූයේ නැහැ. අවසානයේදී නැගී එන ජන මතයට එකඟ වූ ඔහු නෙදර්ලන්තයේ දේශපාලන රැකවරණය ලබා ගත්තා.
දෙවැනි ලෝක යුද්ධය අවසානයේදී ඉතාලියේ රජකළ තුන්වැනි වික්ටර් එම්මානුවෙල් රජු හට සිහසුනෙන් ඉවත් වන ලෙස දේශීයව සහ විදේශීයව දැඩි පීඩනයක් එල්ල වුණා. ඒ අනුව ඔහු එම ධුරයෙන් ඉවත්ව ඉතාලියේ රජ කිරුළ සිය පුත්‍රයා වන උම්බර්ටෝ හට පැවරුවා. එමගින් ඔහු අපේක්ෂා කරන ලද්දේ ඉතාලි රජ පවුලේ බලය තවදුරටත් ආරක්ෂා කර ගැනීමයි. කෙසේ වෙතත් එය සාර්ථක වූයේ නැහැ. ජනමත විචාරණයකින් අනතුරුව ඉතාලි වැසියන් උම්බර්ටෝ රජුව බලයෙන් පහකොට සිය මව් රට සමූහාණ්ඩුවක් බවට පත් කිරීමට ඡන්දය ලබාදුන්නා.
Saru FM Media
