විලාසිතා ගැන කතා කරන්න කවුද ඉතින් අකමැති. ඉස්සර එක්දහස් නවසිය බර ගණන් වලදි නම් මේ විලාසිතා කියන සබ්ජෙක්ට් එකට වැඩිපුරම උනන්දු උනේ ගැහැණු පාර්ශවේ විතරක් උනාට අද වෙනකොට විලාසිතා කියන්නෙ ගැහැණු, පිරිමි දෙගොල්ලොම කරට කර උනන්දුවෙන ලොකු විෂය පථයක්. හැබැයි මේ කතා කරන්න යන මාතෘකාව නම් දැක්ක හැටියෙම අපේ අයියලා, මල්ලිලා ටික සුටුස් ගාල ලිස්සල යනවා. මොකද කොච්චර විලාසිතා ගැන උනන්දු වෙන පිරිමියෙකුට උනත් තමන්ගේ භාවිතයටනම් ඕනෙම වෙන්නෙ නැති මෙවලමක් ගැනයි මේ කතාව. ඒකනෙ අපි අක්කලා, නංගිලා කියලම කතාව පටන් ගත්තෙ. හැබැයි ඉතින් පිරිමි පාර්ශවේ උනත් තමන්ගේ Girlfriend ට, Wife ට එහෙම කියල දෙන්න මේ කතාව කියව ගත්තට පාඩු නැහැ.
මොනවා අහනවද මන්ද? ලිප්ස්ටික් කිව්වම කව්ද අනේ නොදන්නේ? ඒක හරි. ලිප්ස්ටික් ගෑවෙ නැතත් අඩුම ගාණෙ ඒ වචනෙවත් අහල නැති මනුස්ස පරාණයක්නම් හොයාගන්න නැතිවෙයි තමයි මේ කාලෙ. හැබැයි ඉතින් මේ වචනෙ උච්චාරණය කරන වැරදි විදි නිසා ඔහේ ඇහුනට කියනව විනා මේකෙ හරිම තේරුම දැනගෙනද මේ කට්ටිය කතා කරන්නෙ කියල සැකයක් එනව. මේ ලිප්ස්ටික් පාවිච්චි කරන හුඟක් කාන්තාවෝ අතරෙ උනත් අපිට ඇහෙන නම් තමයි “ලිප්ටිප්, ලිප්ටික්, ලිස්ටික්” වගේ නම්. කනට ඇහෙන විදිහ ටිකක් සමාන උනාට මේකෙ තේරුම පැත්තෙන් ගත්තොත්නම් මේ නම් සම්පුර්ණයෙන්ම වැරදියි. මොකද Lipstick කියන්නෙ Lip ඒ කියන්නෙ තොලට පාවිච්චි කරන stick එක කූර කියන අදහසින්.
ඉතින් මොකක්ද මේ තොල්කූරෙ ඉතිහාසය? දැන් කාලෙ නැති උනාට මානව ශිෂ්ටාචාරයේ මුල් අවධියේදී මේ මේකප් කියන්නෙ ගැහැණු පිරිමි දෙකොට්ඨාසයටම තමන්ගෙ මුහුණු හැඩකරගන්න භාවිතා කරපු උපක්‍රමයක්. දැනට හොයාගෙන තියෙන තොරතුරු වලට අනුව ගස්වල පොතු වගේ ස්වභාවික ද්‍රව්‍ය යොදාගෙන මුලින්ම තොල් ආලේපන පාවිච්චි කරලා තියෙන්නෙ සුමේරියන් කියන ශිෂ්ටාචාරයට අයත් මිනිස්සු. ක්ලියෝපැට්‍රා ඇතුළු ඊජිප්තු කාන්තාවන් ඉතා තද පැහැති වර්ණ වලින් තොල් ආලේපන ගල්වපු බවට ප්‍රසිද්ධයි. ඒ ආලේපන සකස් කරගෙන තියෙන්නෙ කෘමීන්ගෙන් ලබාගත්ත වර්ණ වලින්. ඝනකම මුල්ම තොල් ආලේපන නිපදවන්නෙ අරාබි විද්‍යාඥයෙක් කියල තමයි සඳහන් වෙන්නෙ. ඒ වගේම මී ඉටි වලින් සකස් කරපු තොලේ ආරක්ෂාවට ගල්වන මුල්ම තොල් ආලේපන හොයාගෙන තියෙන්නෙ චීන ජාතිකයින්.
ලස්සනට ගෑවට අපි හුඟක් දෙනෙක් මේ ලිප්ස්ටික් හැදෙන හැටි දන්නෙ නැහැනෙ. ලිප්ස්ටික් හදන්න භාවිතා කරන මූලිකම අමුද්‍රව්‍ය තමයි මී ඉටි වගේ ඉටි වර්ග, එළවලු තෙල්, ඛණිජ තෙල් වගේ තෙල් වර්ග සහ වර්ණක. ඊට අමතරව එක එක තොල් වලට හොඳ ඖෂධ වර්ග, සුවඳ වර්ග වගේ දේවලුත් අතිරේකව එකතු කරන්න පුළුවන්. මුලින්ම වර්ණක සහ තෙල් හොඳින් එකට කලවම් කරල, ඊළඟට ඒවා දියකරගත් ඉටි එක්ක එකතු කරල, හුළං බුබුළු නොහිටින්න අච්චුවකට සෙට් කරගෙන නිවාගැනීම මඟින් තමයි අපේ අතට අන්තිමට එන හැඩයට මේ ලිප්ස්ටික් හදාගන්නෙ.
Saru FM Media
